Sekretari i përgjithshëm i NATO-s, Jens Stoltenberg, ka dhënë sot një konferencë shtypi në Bruksel, ku ka njoftuar se aleanca ushtarake euroatlantike ka për të dislokuar katër batalione shumëkombëshe në shtetet balltike dhe në Poloni. Nëpërmjet dislokimit të këtyre trupave kërkohet të forcohet më tej mbrojtja e këtyre vendeve.
Vendimi do të miratohet ditën e martë, në takimin e ministrave të Mbrojtjes të NATO-s. Që prej aneksimit të Krimesë nga Rusia, e përfshirjes së saj në konfliktin në Ukrainë, është kërkuar prej Polonisë, Estonisë, Letonisë dhe Lituanisë një prani më e madhe e NATO-s në rajon.
“Kemi rënë dakort ta shtojmë praninë tonë në pjesën lindore të Aleancës. Tani po diskutojmë madhësinë, rrezen dhe përbërjen e kësaj force. Mbështetur në këshillën e planifikuesve tanë ushtarakë, ne do të pajtohemi për të dislokuar me rotacion katër batalione shumëkombëshe në shtetet balltike dhe në Poloni.”
Sekretari i përgjithshëm i NATO-s nuk iu referua drejtpëdrejt Rusisë si arsye për një dislokim të tillë forcash. Por ai theksoi me forcë se, “Kjo ka për të dhënë një sinjal të qartë se NATO-ja është gati të mbrojë çdo aleat.” /tesheshi.com/
