Ka rënë dhe mundësia matematike që e mbante Napolin në lojë për fitimin e Serisë A. Një mundësi matematike që nuk ia lejonte Juventusit t’i gëzohej titullit të pestë kampion në pesë vitet e fundit.
Napoli ka humbur sot në mesditë në “Olimpico” ndaj Romës, çka do të thotë se diferenca mes tij dhe Juventusit është tashmë 12 pikë, kur duhen dhe tre javë nga përfundimi i kampionatit italian.
Një ndeshje që ka qenë në barazpeshë deri afër fundit, kur edhe ka ardhur goli i vendasve. Nainggolan ka shënuar në minutën e 89-të.
Fitorja 1-0 e Romës ndaj Napolit e bën të diskutueshëm dhe vendin e dytë. Pasi kanë çuar dëm një tjetër përpjekje për ta fituar Serinë A, napolitanët rrezikojnë dhe vendin e dytë. 73 pikë kanë ata kundrejt 71 të romanëve.
Përndryshe, ky kampionat ka një shije të veçantë për Juventusin, i fituar pas një nisje katastrofike të sezonit. Juventusi fitoi vetëm një nga gjashtë ndeshjet e para, me kupën të mbushur më 28 tetor. Humbja 1-0 në fushën e Sasuolos i çoi torinezët të dymbëdhjetët në tabelën e renditjes, 11 pikë larg ekipit kryesues.
Që andej filloi kthesa për Juventusin, ndërsa tre ditë më pas mund 2-1 Torinon në derbin e qytetit. 24 fitore në 25 ndeshjet pasuese të Serisë A, me të vetmet të lënë në barazimin 0-0 ndaj Bolonjës. Fitorja më 13 shkurt ndaj Napolit i mundësoi kryesimin “Zonjës së Vjetër”, për të mos e lëshuar më që atëherë.
Synimi për sezonin e ardhshëm është vënë që tani, teksa do të kërkohet fitimi i Champions League-s. Nëse kampionati italian do të fitohej për herë të gjashtë, ky do të ishte një rekord tjetër i Juventusit. Sidoqoftë, deri atëherë ka kohë. /tesheshi.com/
