“Ta mundim këtë kancer”. Me këtë moto, komuniteti islamik në Itali ka zbritur në sheshet e tre qyteteve më të mëdha italiane si: Roma, Milano e Xhenova, në manifestime kundër terrorizmit dhe islamofobisë.
Pas Palermos, Parmës, Reggio Emilia-s dhe Lucca-s, sot manifestimet janë zhvilluar në metropole për të thirrur fort: ‘Jo në Emrin Tim”. Pikërisht dje, Sekretari i Qendrës Kulturore të Xhamisë së Madhe të Kryeqytetit ka shpallur gjatë faljes së xhumasë, dënimin e qartë e të prerë ndaj akteve terroriste të Parisit.
“Kemi shtuar një paragraf ku dënojmë terrorizmin, duke theksuar se jeta njerëzore është e shenjtë dhe atentatet janë të papranueshme nga Islami dhe myslimanët”, tha Abdullah Redouane.
“Terrorizmi shfrytëzon fenë për qëllime politike dhe ideologjike”, ka shtuar ai, duke sulmuar atë që e quajti “një intepretim të falsifikuar të fesë, i merr të rinjtë dhe i bën lavazh truri e i fut në një radikalizëm që duhet ta luftojmë”.
Redouane i ka bërë thirrje imamëve në të gjithë Italinë, që “të mos largohen nga mesazhi i paqes dhe të mos bien në grackën e radikalizmit”. Fjalë të qarta dhe të pritura nga shumë njerëz.
Pasdite, në sheshin “Santi Apostoli” në Romë ka marrë jetë iniciativa kombëtare kundër terrorizmit, nga ana e Bashkimit të komuniteteve Islamike Italiane (Ucoii).
Në shesh ishin dhe eksponentë të së majtës italiane, sindikatave Cisl dhe Cgil, që u përfaqësua nga Susanna Camusso.
Në Milano, një manifestim tjetër u zhvillua si nismë kundër luftrave dhe islamofobisë.
Gjithashtu në një qytet tjetër në Xhenova, është rritur mobilizimi i komuitetit islamik për të bërë që të dëgjohet zëri i tyre.
Marrë nga “La Repubblica”-tesheshi.com
