“Ajo çka unë kërkoj nga të gjithë, është që kjo çështje të mos politizohet, sepse një gjë e tillë nuk do të ishte e ndershme. Unë gjithsesi do ta shqyrtoj këtë çështje dhe ju shpejt do të njoftoheni për vendimin përfundimtar”, iu ka thënë kryeministri i Kosovës Isa Mustafa, familjarëve të Isa Boletinit dhe zyrtarëve komunale të Mitrovicës në një takim që kanë pasur në Prishtinë. “Nuk është e thënë që heroi ynë të rivarroset në Vlorë” ka thënë Mustafa.
Në anën tjetër Kryetari i Komunës, Agim Bahtiri, ka njoftuar kryeministrin Mustafa, me reagimet e bashkëfshatarëve, bashkëqytetarëve, institucioneve komunale, shoqatave të dala nga lufta, shoqërisë civile, intelektualëve etj, jo vetëm nga Mitrovica, por pothuaj nga gjithë vendi. Të gjithë bashkë kemi kundërshtuar vendimin e ri të Këshillit Organizativ për rivarrim, që eshtrat e heroit kombëtar Isa Boletinit të rivarrosen në Vlorë, e jo në Boletin ka thënë Bahtiri.
Ai tha se ka pas reagime të shumta që e kundërshtojnë këtë vendim të Këshillit Organizativ, që shkaktoi indinjatë dhe shqetësime në Mitrovicë. Është kërkesë vendimtare, jo vetëm e institucioneve dhe qytetarëve të Mitrovicës, por edhe e atyre në nivel vendi, që rivarrimi i eshtrave të Isa Boletinit të Shalës së Bajgorës.
“Ne si institucion komunal, bashkë me familjarët e heroit Isa Boletini dhe përfaqësuesit e partive politike të përfaqësuara në Kuvendin e Komunës, jemi sot këtu që të kërkojmë nga ju si kryeministër, që këtë çështje ta diskutoni në qeverinë e Kosovës dhe të anuloni vendimin e fundit Këshillit Organizativ, në mënyrë që rivarrimi të bëhet ashtu sikur ishte parapa në fillim, në vendlindjen e tij në Boletin, më 10 qershor”, ka thënë Bahtiri.
Ai i ka thënë kryeministrit Mustafa, se të gjitha strukturat e pushtetit lokal në Mitrovicë, familjarët e heroit Isa Boletini, shoqatat e dala nga lufta e UÇK-së, shoqëria civile, intelektualët dhe të gjithë qytetarët e Mitrovicës, kanë marrë vendim, që heroi Isa Boletini të rivarroset gjithsesi në Boletin.
Nëse institucionet qendrore nuk e respektojnë këtë vendim, atëherë komuna, bashkë me familjarët dhe qytetarët, do ta organizojnë vet ceremoninë e rivarrimit në fshatin e lindjes, në Boletin.
Nipi i heroit Isa Boletini, Xhaviti, me këtë rast ka theksuar se si ka qenë nën presion që të pranoj që rivarrimi i eshtrave të gjyshit të tij të bëhet në Vlorë, ose të shtyhet për një kohë tjetër.
“Duke ditur moshën time dhe duke parë se me shëndet nuk jam mirë, vendosa që të pranoj që gjyshi të rivarroset në Vlorë, por vetëm përkohësisht” ka thënë Xhaviti.
Mirëpo, kur në takim ia thashë këtë kryeministrit të Shqipërisë, Edi Rama, ndërsa ai më foli për diçka tjetër, atëherë e kuptova se kisha gabuar që dhashë pëlqimin për rivarrim në Vlorë. Dhe gjatë gjithë rrugës së kthimit vetëm mendoja se si të tërhiqem. Fatmirësisht, kur erdha në Mitrovicë e i pashë reagimet dhe kërkesat e qytetarëve, atëherë nuk u hamenda fare dhe ju thashë se do ta tërheq vendimin tim.
Eshtrat e gjyshit Isa, do i rivarrosim vetëm në Boletin dhe askund tjetër. Prandaj, zoti kryeministër ju lutem që ai vendim i Këshillit Organizativ të anulohet”, tha Xhaviti.
“I kuptoj seriozisht shqetësimet e familjarëve të heroit Isa Bletini, të institucioneve komunale dhe qytetarëve të Mitrovicës, andaj edhe për kërkesën e juaj duhet të bisedohet patjetër” ka thënë Kryeministri i Kosovës Isa Mustafa, përfaqësuesve nga Mitrovica.
Sipas tij “së pari do të bisedohet me Këshillin Organizativ, pasi që aty është marrë vendimi për rivarrimin e eshtrave të heroit Isa Boletini, në Vlorë. Institucionet komunale dhe ato qendrore duhet të jenë së bashku në këtë ceremoni” ka thënë Mustafa.
“Ajo çka unë kërkoj nga të gjithë, është që kjo çështje të mos politizohet, sepse një gjë e tillë nuk do të ishte e ndershme. Unë gjithsesi do ta shqyrtoj këtë çështje dhe ju shpejt do të njoftoheni për vendimin përfundimtar. Nuk është e thënë që heroi ynë të rivarroset në Vlorë. Edhe pse ai tashmë, për shkak përmasave kombëtare që ka si personalitet i shquar, është i popullit, prapë se prapë, duhet parë vullnetin e familjarëve, por edhe të qytetarëve dhe institucioneve të Mitrovicës. Dhe për këtë, nuk ka pse të hidhërohet askush. Sido që të jetë, Isa Boletini, duhet të rivarroset në mënyrë dinjitoze, ashtu sikur që e meriton”, ka thënë kryeministri Mustafa.
Në këtë takim Kryetari i komunës Agim Bahtiri, ka qenë i shoqëruar nga familjarët e heroit Isa Boletini, Xhavit e Gazmend Boletini, kryesuesi i Kuvendit të Komunës, Bislim Imeri dhe shefat e disa grupeve të këshilltarëve të partive politike të përfaqësuara në Kuvendin e Komunës.
/tesheshi.com/
