Në një komunikatë për media ka reaguar i pari i qeverisë së Kosovës z. Isa Mustafa, për debatet e fundit dhe kritikat që i janë bërë qeverisë Mustafa se kryeministri ka qenë i informuar nga AKI për incidentin në Kumanovë. Ai në ketë reagim thotë se shprehim shqetësimin lidhur me tendencat për manipulimin e opinionit se gjoja Kryeministri ka pasur informata nga AKI lidhur me ngjarjet që mund të ndodhnin në Kumanovë.
Sigurojmë opinionin se po që se Kryeministri i Republikës së Kosovës do të dispononte me informata të tilla, jo vetëm që me urgjencë do të kërkohej nga institucionet e sigurisë për të ndërmarrë të gjitha veprimet parandaluese, por një gjë e tillë do të kërkohej edhe nga autoritetet e Republikës së Maqedonisë, me qëllim të parandalimit të humbjes së jetës së njerëzve dhe dëmtimit të pronës, thuhet në deklaratën e kryeministrit Mustafa.
Ai apelon për përmbajtje nga ndërhyrjet në punën e pavarur të organeve të drejtësisë, duke konsideruar se ndërhyrjet e tilla nuk i shërbejnë sundimit të rendit dhe ligjit, për të cilin do të duhej të ishim të përkushtuar të gjithë.
Po ashtu kryeministri Mustafa bënë thirrje për një hetim të pavarur, objektiv dhe gjithëpërfshirës, me qëllim të ndriçimit të plotë të rrethanave dhe pasojave të cilat kanë rezultuar me viktima në njerëz dhe dëme të shumta të pronave. Kryeministri i Republikës së Kosovës apelon që për shkak të rrethanave, ky hetim të mbështetet edhe nga organet e drejtësisë ndërkombëtare, thuhet në reagimin e lëshuar për media nga qeveria e Kosovës./tesheshi.com
