Muslimanët, ministrja indiane ironizon Obama-n

Ministrja e Financave e Indisë është tallur me komentet e ish-presidentit amerikan Barack Obama se qeveria e kryeministrit Narendra Modi duhet të mbrojë të drejtat e muslimanëve, duke e akuzuar atë për hipokrizi.

Gjatë vizitës shtetërore të Modit në Shtetet e Bashkuara javën e kaluar, Obama i tha CNN se çështja e “mbrojtjes së pakicës muslimane në Indinë me shumicë hindu” do të ia vlente të ngrihej në takimin e tij me presidentin amerikan Joe Biden.

Obama tha se pa një mbrojtje të tillë, ekziston “një mundësi e madhe që në një moment India të fillojë të shpërbëhet”.

 Ministrja Nirmala Sitharaman tha se ishte e tronditur që Obama bëri komente të tilla kur Modi po vizitonte SHBA-në për të thelluar lidhjet.

“Ai bëri komente për muslimanët indianë…pas bombardimit të vendeve me shumicë myslimane, nga Siria në Jemen… gjatë presidencës së tij”, tha Sitharaman në një konferencë për shtyp.

Departamenti Amerikan i Shtetit ka shprehur shqetësim për trajtimin e muslimanëve dhe pakicave të tjera fetare në Indi nën partinë nacionaliste hindu të Modit. Qeveria indiane thotë se i trajton të gjithë qytetarët në mënyrë të barabartë.

“Ne jetojmë një demokraci”

Biden tha se ai diskutoi të drejtat e njeriut dhe vlerat e tjera demokratike me Modi gjatë bisedimeve të tyre në Shtëpinë e Bardhë.

Modi, në një konferencë shtypi me Biden javën e kaluar, mohoi çdo diskriminim ndaj pakicave nën qeverinë e tij.

“Ne dëshmuam se demokracia mund të japë rezultate. Pavarësisht nga kasta, besimi, feja, gjinia – nuk ka absolutisht asnjë vend për asnjë diskriminim [në qeverinë time]”, u tha Modi gazetarëve në Shtëpinë e Bardhë.

“Demokracia është shpirti ynë,” shtoi Modi. “Demokracia përshkon venat tona”.

Udhëheqësi 72-vjeçar akuzohet se ka kryesuar partinë e tij qeverisëse Bharatiya Janata (BJP) duke miratuar një ligj anti-musliman dhe duke zbatuar politika anti-muslimane. Këto përfshijnë një ligj për shtetësinë dhe përfundimin e statusit special të Kashmirit të administruar nga Indianët, rajoni i vetëm me shumicë muslimane të Indisë, në vitin 2019.

Zyra e Kombeve të Bashkuara për të Drejtat e Njeriut e përshkroi ligjin e shtetësisë si “thelbësisht diskriminues” për përjashtimin e emigrantëve muslimanë.

Kritikët kanë vënë në dukje gjithashtu ligjet kundër konvertimit që sfidojnë të drejtën e mbrojtur me kushtetutë për lirinë e besimit. /tesheshi.com/