Ish-presidenti egjiptian, i detyruar me dhunë ta lërë postën gati dy vite të shkuara, mund të përballet nesër me dënimin me vdekje në seancën gjyqësore në ngarkim të tij për nxitje të vrasjes së protestuesve.
Janë po ashtu dy gjyqe të tjera ndaj tij ku ai mund të dënohet përsëri me vdekje, dhe vendimet për to do të jepen më 16 maj.
Mursi u përmbys më 3 korrik 2013 nga presidenti aktual Abdulfettah es-Sisi, asokohe shef i ushtrisë. Autoritetet e reja nisën më pas një fushatë shtypëse ndaj mbështetësve të Mursit, gjatë së cilës janë vrarë më tepër se 1400 persona dhe janë burgosur mijëra të tjerë.
Dënimi me vdekje nuk mund të përjashtohet më 21 prill për ish-presidentin e parë të zgjedhur lirisht, pasi gjykatësit kanë dhënë më herët vendime të ashpra për udhëheqësit e Vëllazërisë Muslimane.
Grupet e të drejtave e cilësojnë më shtypës regjimin e Sisit se atë të Mubarakut.
Vendimi i së martës ndaj Mursit dhe 14 të pandehurve të tjerë ka të bëjë me vrasjen e tre protestuesve dhe torturimin e ca të tjerëve gjatë përplasjeve përpara pallatit presidencial më 5 dhjetor 2012.
Avokatët thonë se nuk ka prova se Mursi i nxiti përleshjet, e se ca prej të vrarëve ishin anëtarë të Vëllazërisë.
Sidoqoftë, edhe nëse ish-presidenti i shpëton dënimit me vdekje, ai mund të dënohet me burgim të përjetshëm.
Koha në drejtim të vendit e Muhammed Mursit qe e shkurtër, ndërsa ai u rrëzua nga ushtria, e mësuar prej dekadash ta ketë pushtetin në vend. /tesheshi.com/
