Jose Mourinho është në bisedime për të marrë drejtimin e Mançester Junajtedit, në një kthim tjetër në futbollin anglez. Afrimi i tij i mundshëm në klubin e shumë trofeve ështhë lajmi i ditës në shtypin botëror sportiv, me ç’rast nuk mungojnë dhe deklaratat pro e kundër.
Carlo Ancelotti e ka quajtur shkurt “fantastike” nëse Mourinho bëhet trajneri i Mançester Junajtedit. Italiani pretendon se klubi anglez ka humbur shumë prej identitetit të tij gjatë vitit të fundit, e se Mourinho është zgjedhja e duhur për t’u kthyer te ditët e lavdishme.
Por ndryshe mendon Eric Cantona, ish-lojtari i Mançester Junajtedit, një prej atyre që kanë lënë gjurmë në historinë e këtij klubi.
Ai thotë se Guardiola, e jo Mourinho, do të ishte i përshtatshëm për “djajtë e kuq”.
“E dua Jose Mourinho-n, por sa ka të bëjë me llojin e futbollit që ai luan, nuk mendoj se është i Mançester Junajtedit.”
“Guardiola ishte ai që duhej të merrej. Ai është biri shpirtëror i Johan Cruyff-it. Ai është i vetmi që mund ta ndryshojë Mançester Junajtedin.”
Pep Guardiola do të jetë në fakt në Mançester, por do të drejtojë Mançester Sitin, skuadrën rivale të Man. Junajtedit.
Ja ç’thotë Cantona: “Do të kisha dashur ta shihja Guardiola-n te Mançester Junajtedi. Ai është në Mançester, por në atë të gabuarin.”
Emërimi i Mourinho-s pritet të bëhet i ditur gjatë kësaj jave. /tesheshi.com/
