Rusia do ta mbyllë hapësirën e saj ajrore për avionët ukrainas duke filluar nga 25 tetori, në kundërpërgjigje ndaj të njëjtit vendim të marrë nga autoritetet ukrainase për transportuesit ajrorë rusë.
Kievi vendosi të premten që shkoi, më 25 shtator, që t’i ndalojë kompanitë ajrore ruse Aeroflot dhe Transaero të fluturojnë drejt Ukrainës. Një vendim qeveritar i ndaloi gjithashtu avionët rusë që transportojnë pajisje ushtarake të fluturojnë mbi hapësirën ajrore ukrainase.
Hapave të mësipërm u pati paraprirë më 16 shtator vendosja e sanksioneve nga Ukraina për 25 linja ajrore ruse.
Ndalimet e imponuara nga Kievi nisin po ashtu më 25 tetor.
Moska e pati quajtur një “akt çmendurie” vendimin e Kievit, ndërsa Rusia është partneri kyç tregtar i Ukrainës, e si rrjedhojë pritet të preken nga ndalesat një sërë sektorësh ekonomikë të kësaj të fundit.
Ministri rus i Transportit, Maksim Sokolov, u shpreh kështu në lidhje me vendimin: “Ne e kuptojmë se në realitet kjo ka për ta ndaluar shërbimin ajror midis dy vendeve. Dhe përgjithësisht janë qytetarët ukrainas që do të vuajnë. Por dëshiroj të theksoj se, në kontekstin e tanishëm, janë veprimet e autoriteteve ukrainase që sollën një kundërpërgjigje nga pala ruse.”
Sipas shifrave të dhëna nga ministri në fjalë, rreth 70 për qind e pasagjerëve që fluturuan nga Ukraina në Rusi dhe anasjelltas gjatë këtij viti ishin qytetarë ukrainas. /tesheshi.com/
