Ai ka braktisur banesën e vet për të lënë që të jetojnë aty katër fëmijët adoleshentë, duke i lënë në këtë mënyrë tërësisht të lirë. Këtë gjë ka bërë një burrë i moshuar britanik, John Tompkins, i cili është transferuar në kopsht dhe fle në një tendë që prej muajit shkurt.
Burri, i cili është ndarë nga gruaja, ka marrë kujdestarinë e vajzave 14 dhe 15 vjeçare si dhe të të birit 12 vjeçar, pasi nëna e tyre u sëmur dhe nuk mund të kujdesej më për adoleshentët. Burri, i cili ka dalë në pension, ka sakrifikuar dhomën e tij të gjumit dhe fillimisht është zhvendosur në divan.
Pas shumë netëve pa gjumë mendoi të transferohej në kopshtin e banesës së tij në Walsall, West Mids.
Tompkins është një ish ushtarak i dalë në pension dhe nuk ia lejon vetes së tij blerjen e një shtëpie të madhe. Mendon se zgjidhja mund të jetë e përkohshme dhe pret që të krijojë kushtet e nevojshme për tu transferuar në një pronë më të madhe.
“Dy vajzat e mia kanë nevojë për privatësinë e tyre. Për to ishte shumë traumatike ndërrimi i vendit ku banonin si dhe i zakoneve të përditshme”, – shpjegon John. Ai shton se jetesa në tendë nuk është një zgjidhje e mirë dhe mosha nuk ia lejon një gjë të tillë, por po bën maksimumin për t’ia bërë jetën më të thjeshtë e më të lumtur fëmijëve të tij.
Mjekët e kanë paralajmëruar se fjetja jashtë shtëpisë, në tendë, i bën dëm shëndetit, ndaj po kërkon një mënyrë alternative për të zgjidhur problemin. /tesheshi.com/
