Nga Mensur Krasniqi
Pas vendimit përfundimtar të partive politike jashtëparlamentare shqiptare në Maqedoni që në zgjedhjet e afwrta të mos garojnë si një aleancë e përbashkët, u përfolën shumë arsye të ndryshme. Mirëpo njëri ndër iniciatorët që me autoritetin e tij ka provuar të ndërmjetësojë që Lëvizja BESA dhe LR-PDSH e Ziadin Selës si bartëse të këtij fronti opozitar së bashku me partitë e tjera me rejting më të ulët, të tejkalojnë inatet dhe të gjejnë një gjuhë të përbashkët për ta realizuar bashkimin opozitar, kryetari i Shoqatës së ish-të Burgosurve dhe Përndjekurve Politikë, Shpëtim Pollozhani, ka sqaruar arsyen dhe fajtorin e këtij mosbashkëpunimi.
Ai në emisionin “Rruga Drejt..” ka treguar një rast se si ka ndërmjetësuar për bashkëpunim duke ndarë listat e deputetëve në bazë të anketave, mirëpo ky propozim është refuzuar nga kryetari i LR-PDSH-së, Zijadin Sela.
“Ne gjetëm një zgjidhje solomonike për ta evituar grindjen rreth çështjes së listave. Ne propozuam që të zgjidhet një agjencion relevant, rezultatin e të cilit do ta pranojnë përfaqësuesit e të dy grupacioneve dhe në bazë të përqindjes, për shembull nëse LR-PDSH ka 70 për qind të votave pro, nga të anketuarit nëse janë 2.000 ose 4.000, atëherë të ketë edhe 70 për qind të deputetëve nëpër lista. Këta të BESËS u pajtuan, thanë kjo është zgjidhje ideale. Unë sa nuk fluturova deri sa erdha në Strugë. U takuam me Zijadinin, Zijadini nuk e pranoi këtë propozim, tha ne jemi për t’i ndarë votat në tri pjesë”, ka thënë Pollozhani.
Ai ka shtuar se po të ishte pranuar ky propozim, atëherë ndoshta do të arrihej bashkëpunimi.
Ky arsyetim i Pollozhanit ka gjetur mbështetje të madhe, pothuajse nga të gjithë kryesia e Lëvizjes BESA, përfshirë këtu edhe n/kryetaren Ermira Asani Salija. Sipas saj, verzsioni të cilin e ka shpjeguar Pollozhani është arsyeja e vetme për të cilën nuk është arritur bashkëpunimi.
“Një e vërtetë objektive, krejtësisht e paanshme në lidhje me bashkëpunimin, gjitha të tjerat bien në ujë!”, ka shkruar në profilin e saj zyrtar, Ermira Asani Salija.
Nga ana tjetër, edhe analisti politik Hadi Osmani ka goditur me ironi kreun e LR-PDSH-së, Ziadin Selën pas deklaratës së Shpëtim Pollozhanit ku tregoi se ai pra, Sela nuk ka pranuar bashkimin opozitar sipas rejtingut të partive në bazë të sondazheve, ngase partia e tij në këtë formë nuk do arrinte ta nxjerrë në listë për deputet as vet kryetarin.
“Më në fund Sela paska bërë një punë si duhet. Normalisht që nuk ka pranuar që të angazhojnë agjenci për sondazhe dhe sipas sondazhit të caktojnë listat për deputetë pasi deri më tani Sela as që po arrin të llogaritet si kandidat në sondazhe. Shembull është Instituti Amerikan IRI që disa herë rradhazi as që e bën hesap. Apo edhe sondazhet e fundit që e tregojnë se është partia e katërtë apo pestë në rënditje”, ka shkruar Hadi Osmani në profilin e tij në facebook.
Ndryshe, sipas anketës së fundit të Institutit për Hulumtimin e Politikave dhe Qeverisjes së Mirë (IHPQM) Lëvizja Besa jo vetëm që konfirmohet si parti e dytë në bllokun politik shqiptar, por edhe diferenca e BDI-së po shkrihet dhe tashmë është minimale. Sipas kësaj ankete, BDI është akoma në krye me 13.4%, por dallimi ndaj Lëvizjes Besa tashmë është vetëm 3%. Me 10.2% Besa është bindshëm në vend të dytë, përpara PDSH-së me 6.3% dhe LR PDSH-së e cila ka rejting prej 5%. /tesheshi.com/
