Kryetarja e LSI-së, Monika Kryemadhi ka treguar për herë të parë një nga prapaskenat që kanë tensionuar situatën politike para zgjedhjeve të 25 qershorit në Tiranë.
Në një intervistë televizive, Kryemadhi tha se LSI ka qenë disa herë gati të ikte nga qeveria e Edi Ramës, por ai i kishte votat me deputetë të PD-së.
Kreu i LSI-së, tha se koha kur u poq largimi nga qeveria ishte largimi i Ylli Manjanit nga posti i Ministrit të Drejtësisë.
“Z.Manjani u shkarkua nga z. Rama. Unë nuk e kam pranuar personalisht. Sigurisht që LSI do të merrte vendimet shumicës. Unë isha pakicë. Kam votuar kundër shkarkimit. Nuk kam asnjë lloj kompleksi në këtë drejtim. Unë e kam thënë dhe do ta them gjithmonë që në momentin që ai zotëri shkarkoi z. Manjani, LSI duhet të ishim larguar nga qeveria, edhe pse ai i kishte votat në Grupin e Partisë Demokratike. Këtë e dinë shumë mirë edhe vetë deputetët e PD-së.
Ata e dinë më mirë se ne që edhe po të largoheshim ne nga qeveria Rama i kishte votat për të bërë qeverinë tjetër”, tha Kryemadhi
/tesheshi.com/
