Një tjetër vendim për lirim me kusht të një eksponenti të famshëm të botës së krimit është marrë nga Gjykata e Krujës. Gjyqtarja Enkelejda Hoxha, pasi liroi Genc Tafilin, vrasësin e komisarit Zylyftari, ka marrë vendim të ngjashëm për lirim me kusht me monitorim elektronik për një vit, edhe për Ilir Pajën, i quajtur ndryshe nga autoritetet italiane si “UFO”.
Paja ka një sërë precedentësh penalë, që nga vrasjet dhe plagosjet me dashje dhe deri tek përdhunimet. Ai ka mundur të arratiset tre herë nga burgjet italiane, ndërsa në Shqipëri gjatë operacionit për arrestimin e tij plagosi rëndë një oficer policie që e mbante nën vëzhgim.
Për këtë ngjarje ai u dënua me gjashtë vite burgim, ndërsa i kishte mbetur edhe një vit nga dënimi, i cili iu fal nga gjyqtarja Enkelejda Hoxha.
Gjyqtarja është në procedurë verifikimi edhe për rastin e lirimit pak ditë më parë të Genc Tafilit. /tesheshi.com/
