Donald Lu mësohet se i ka dorëzuar Ilir Metës një dokument të rëndësishëm zyrtar që ka të bëjë me draftin e reformës në Drejtësi.
Përpara se të hyjë në selinë e Kryesisë së Kuvendit për t’u takuar me kryetarin Ilir Meta, Donald Lu ka pasur në dorë një letër të cilën e ka treguar përpara kamerave edhe pasi ka dalë.
Burime nga Komisioni i Reformës në Drejtësi bëjnë të ditur se shkresa e ambasadorit ka qenë një material i përgatitur nga një prej ekspertëve më të rëndësishëm konstitucionalistë amerikanë, i cili ka bërë një analizë mbi draftin aktual të reformës në drejtësi.
Ky material pritet që do të diskutohet së bashku me Komisionin e Venecias për të arritur në një material kompromisi që do të bindë opozitën që të votojë reformën për Drejtësi.
Burimet thonë se ndërkombëtarët po bëjnë një tentativë të fundit për të bindur Partinë Demokratike, përndryshe ndryshimet kushtetuese do të marrin vetëm votat e mazhorancës.
Ndërkaq, ambasadori Lu mësohet se i ka kërkuar Metës qëndrimin e deputetëve të LSI-së për draftin tashmë të hartuar nga ekspertët, draft të cilin diplomati amerikan e ka cilësuar si qëndrim politik të qeverisë amerikane.
Madje një ditë më pare, gjatë një interviste për agjencinë BIRN, Donald Lu tha se “kemi direktiva të qarta nga ana e Shtëpisë së Bardhë” për kalimin e reformës që pritet të krijojë dy pasoja: të nisë pastrimin në sistemin gjyqësor dhe të ngrejë Byronë Kombëtare të Hetimit, i cili është sipas modelit të FBI-së amerikane.
Mësohet gjithashtu se një pjesë e shkresës që ka pasur Lu në dorë ka analizuar me hollësi përbërjen dhe strukturën e një institucioni që do të hetojë dhe ndjekë zyrtarët e korruptuar.
Në takim. për rreth 3 orë është folur me detaje për draftin e sjellë nga Lu. Me vete, diplomati amerikan ka pasur edhe ekspertin shqiptaro-amerikan që po merret me asistencën e prokurorëve shqiptarë në luftën ndaj korrupsionit. /tesheshi.com/
