Një tis misteri ka mbuluar vizitën e zyrtarit të lartë të Departamentit të Shtetit Hoyt Brian Yee në Tiranë, i cili ka bindur Lulzim Bashën që të pranojë që të hyjë në zgjedhje me një marrëveshje të negocuar që përjashtonte kushtin e panegocuar të kreut të opozitës: “qeverinë teknike”.
Çfarë solli në Tiranë diplomati më me përvojë mbi Ballkanin në administratën e Presidentit Donald Trump?!
Burime të rëndësishme prej aktorëve të përfshirë në negociata, pjesë të mazhorancës dhe opozitës konfirmojnë se ai ka zhvilluar një takim kokë më kokë me zotin Lulzim Basha dhe një telefonatë me ish-kryeministrin Sali Berisha.
Pikërisht këto biseda janë shumë konfidenciale dhe ka një mister të madh mbi argumentin e fuqishëm që ka sjellë emisari i Rex Tillersonit në Tiranë.
E në fakt Hoyt Yee është kreu i Drejtorisë për Euroazinë, ku ndodhet edhe zyra për Shqipërinë, dhe është pikërisht ky organ që merret me dosjet e Shqipërisë dhe jo Sekretari i Shtetit që del në skenë për çështjet e mëdha globale.
Dhe në nga mali i madh i dosjeve, mësohet se Hoyt Yee ka sjellë një fashikull shumë tronditës në Tiranë, i cili mësohet se ka të bëjë me një material mbi financimet e qarqeve ruse në politikën shqiptare që prej vjetësh.
Një dosier i detajuar me transferta bankare dhe kompani të ndryshme që kanë lidhje të forta me politikën.
Dhe më dramatikja në këtë dosier është tangencialja e fortë e lidhjes së këtyre parave me një njeri që është kthyer në armikun e Perëndimit në Shkup, Nikolla Gruevskin.
Agjencitë e SHBA dhe vendeve të NATO-s kanë zbuluar lëvizjen e parave që janë paguar për lobime dhe që konvergojnë si në Tiranë dhe në Shkup, por që proveniencën e kanë në adresa “of shore” të dyshimta.
Por që pika e lidhjes është natyrisht Moska, apo qarqet e saj në Ballkan.
Nuk dihet nëse ka qenë pikërisht kjo dosje që ka sjellë zyrtari i lartë amerikan në takimet politike apo ia ka dorëzuar organeve ligjzbatuese shqiptare nëpër kanaleve normale të komunikimit.
Por siç mësohet Hoyt Brian Yee ka ardhur në Tiranë me një dosje të madhe, të cilën e ka mbajtur në dorë, dhe është fotografuar me të duke hyrë në selinë e Partisë Demokratike.
Pas kësaj dite ka ndodhur itinerari tashmë i njohur i Lulzim Bashës nga zyra e tij në PD dhe tek zyra e ish-kryeinistrit Sali Berisha.
Përse Basha ka shkuar kaq shpesh te Berisha nëse gjërat mund t’i zgjidhte me një telefon apo me skype, watsapp, etj.
Por kreu i PD-së natyrisht nuk mund të lejonte që biseda e tij me Berishën të kalojë nëpër filtrat e mundshëm të përgjimeve. Natyrsht jo nga SHISH apo Prokuroria, pasi në këto poste janë njerëz besnikë të Berishës, por nga ato qarqe inteligjente aleate që kanë sjellë dosjen në Tiranë.
I vetmi që ka folur për ekzistencën e një dosje ka qenë avokat Ngjela.
Ai në qarqet mediatike opozitare synohet të mos merret seriozisht duke e shtyrë tek qesharakja.
Por nuk duhet harruar se Ngjela ka marrëdhënie të afërta me Edi Ramën dhe ka mundësinë të marrë informacione të dorës së parë.
Ngjela tregon se zyrtari i DASH ka sjellë një material të gjerë dhe të plotë, por nuk shpjegon natyrisht se çfarë përmban dosja.
Që siç duket ende nuk do të bëhet publike. Të paktën nëse palët bien dakord për një marrëveshje…
/tesheshi.com/
