Rreth 1 mijë të dënuar do të lënë qelitë pas pak ditësh, ndërsa mbi 3 mijë të tjerë do të përfitojnë ulje dënimi. Qeveria miratoi draftin, që tashmë është bërë traditë e çdo fundviti, ku qindra të burgosur i kalojnë festat jashtë qelive.
Mësohet se ky draft u dorëzua në kabinetit të ministrave nga ministria e Drejtësisë.
Ndryshe nga vitet e kaluara, nga kjo amnisti do të përfitojnë të dënuarit me dëmtime të përhershme fizike apo të diagnostikuar me sëmundje të rënda të pashërueshme.
Nga ky draft përfitojnë disa raste të personave nën moshën 18 vjeç, gratë e dënuara që janë mbi moshën 55 vjeç, të dënuarit meshkuj që janë mbi 60 vjeç, personat e dënuar me burgim, që u kanë mbetur për të vuajtur edhe 2 vitet e fundit etj.
Sipas këtij drafti parashikohet të përfitojnë rastet e ndjekjeve penale për çështjet në proces, për veprat penale të kryera deri në datën 30 nëntor 2016, për të cilat Kodi Penal parashikon një dënim me burgim në maksimum deri në 2 vjet, përveç veprave: Kundërshtimi i punonjësit që kryen një detyrë shtetërore ose një shërbim publik, kundërshtimi i punonjësit të policisë së rendit publik, goditjet për shkak të detyrës, kanosja për shkak të detyrës, mosbindja ndaj urdhrit të punonjësit të policisë së rendit publik, goditjet ndaj pjesëtarëve të familjes së personit që kryen një detyrë shtetërore, përvetësimi i titullit apo i detyrës shtetërore, ushtrimi i profesionit të ekspertit kontabël dhe i shoqërisë audituese pa qenë i regjistruar dhe mbajtja pa të drejtë e uniformës./tesheshi.com/
