Të pabazë dhe të sajuar e ka quajtur Vitaly Mutko raportin e WADA-s, Agjencisë Botërore të Antidopingut. Sipas ministrit rus të Sporteve, të gjitha përfundimet e raportit të kësaj agjencie janë mbështetur në burime të pavërtetuara, duke shtuar se ky raport kërkon ta kthejë opinionin publik kundër atletëve rusë.
Ai e hodhi poshtë raportin 323-faqësh, ku thuhet se atletët rusë janë nxitur dhe ndihmuar nga Federata Ruse e Atletikës, nga agjencia ruse e antidopingut, RUSADA, dhe nga laboratori i testeve në Moskë, që t’i shmangen zbulimit të substancave të ndaluara.
“Agjencitë ruse të antidopingut janë sot vërtet të pavarura nga qeveria,” u shpreh Mutko. “Eshtë e pamundur të fshehësh diçka sot. I gjithë informacioni gjendet në bazat e të dhënave të mbikëqyrura nga WADA.”
Raporti i Agjencisë Botërore të Antidopingut flet për fshehje dhe ndryshim të rezultateve antidoping në Rusi. Kjo agjenci ka shkuar më tej, duke kërkuar përjashtimin për dy vite të Federatës Ruse të Atletikës nga të gjitha veprimtaritë ndërkombëtare, përfshirë dhe Lojrat Olimpike të 2016-ës. /tesheshi.com/
