Në bazë të marrëveshjes në kuadër të BE-së për rishpërndarjen e aizlkërkuesve, ka arritur këtë fundjavë në Madrid grupi i parë i refugjatëve.
Dymbëdhjetë persona, mes të cilëve njëmbëdhjetë nga Eritrea dhe një nga Siria janë nisur nga Lampeduza në Itali, për t’u pritur në aeroportin e Madridit nga sekretari i Shtetit për Sigurinë dhe nga shefja e departamentit të emigracionit në Ministrinë spanjolle të Punësimit dhe të Sigurisë Sociale.
Kështu Spanja bëhet vendi i pestë europian që nis një skemë të rishpërndarjes të refugjatëve nga Lindja e Mesme. Atyre do t’u sigurohet strehim, ushqim, kujdes shëndetësor, mësim gjuhe, shkollim e integrim shoqëror.
Qeveria spanjolle pati deklaruar në fillim të shtatorit se do të pranonte 14.931 azilkërkues. Kjo e vendos Spanjën pas Gjermanisë dhe Francës për numrin e pranimit të refugjatëve, me rreth 12.5 për qind të 160.000 prej tyre që pritet të rishpërndahen në vende të ndryshme.
Kjo skemë rishpërndarjeje synon të zvogëlojë barrën e vendeve pritëse, të Italisë e Greqisë, ku dhe ka një vërshim të madh të refugjatëve. /tesheshi.com/
