Për koinçidencë, ministri i Drejtësisë, Ylli Manjani ka shpalosur bilancin e punës 1-vjeçare një ditë pasi Venecia dha verdikt pozitiv për ligjin e pronave të qeverisë. Gëzimin e tij politik, Manjani e shprehu me një status në FB, e sot, bilancin e një viti në krye të dikasterit të drejtëisë, e ka nisur pikërisht me pronat.
“Nuk janë shumë, por 34 ish-pronarë kanë mbyllur dosjet njëherë e mirë me shtetin shqiptar dhe quhen të kompensuar. Aktualisht jemi në fazën e mbylljes përfundimtare të procedurave të identifikimit dhe ky proces do të vazhdojë me të njëjtin ritëm.
Në dritën e Komisionit të Venecias, kjo çështje ka marrë zgjidhje përfundimtare”, ka thënë Manjani.
Më tej ministri i LSI-së, parti e cila është investuar për të marrë kredite të forta politike nga reforma në drejtësi edhe në planin ndërkombëtar, ka vlerësuar reformën vetë dhe atë çfarë pritet te vijë pas saj: rekomandimin e BE-së për nisjen e negociatave të anëtarësimit.
“Pasi kemi realizuar reformën në drejtësi, presim që ky rekomandim të jetë pozitiv. Është me rëndësi që askush të mos bllokojë zbatimin e reformës në drejtësi”, ka vijuar ministri Manjani.
Por një vend të veçantë në deklarimet e tij, edhe për shkak të insistimit të medias, ka qenë rasti i gjyqtares së Durrësit, Joana Qeleshi, e cila trajtoi çështjen e kompanisë “Omnix”, e larguar tashmë nga Shqipëria pas rrahjes brutale të administratorit të saj
.“Gjyqtarja e Durrësit do të shkojë patjetër në KLD për procedim disiplinor. Kjo është e panegociueshme. Për mua ajo duhet shkarkuar menjëherë, por nuk më takon mua të vendos”, ka thënë Manjani. /tesheshi.com/
