Një raport nga Amnesty International flet për rreth 13.000 njerëz të ekzekutuar brenda pak viteve në një burg ushtarak pranë kryeqytetit sirian.
Duke bërë thirrje për një hetim nga OKB-ja, Amnesty International rrëfen në raport se ekzekutimet u kryen mes viteve 2011 dhe 2015.
Bëhet fjalë për burgun ushtarak Sednaja në veri të Damaskut, për të cilin raporti thotë se mesatarisht 20 gjer në 50 të burgosur janë varur çdo javë.
I bazuar në intervistat me 84 dëshmitarë, mes të cilëve gardianë, të ndaluar e gjykatës, raporti hedh dritë për ekzekutimet masive të të burgosurve në mes të natës dhe në fshehtësi të plotë në burgun e qeverisë siriane.
Pjesa më e madhe e viktimave kanë qenë civilë, për të cilët besohet se thjesht ishin kundërshtarë të regjimit të Beshar Esadit.
Amnesty International i ka cilësuar këto ekzekutime si krime lufte dhe krime kundër njerëzimit. Ky organizëm e akuzon qeverinë siriane për “politikë shfarosjeje”. /tesheshi.com/
