Në vijim të një ofensive të paprecedent me theks politik, e gjitha me shënjestër mazhorancën, presidenti Meta po përcjell dhe mesazhin se nuk e njeh këtë të fundit.
Ai ka çuar ftesa për partitë opozitare jashtëparlamentare, për këshillin e ish-ambasadorëve, për ish-presidentët, si dhe për shoqërinë civile, për t’u takuar javën që vjen, siç shprehet, për një diskutim mbi atë që e quan “krizë të rëndë”, që sipas tij duhen gjetur mënyra për ta dalë prej saj.
Por për “zgjidhjen e krizës”, ai nuk fton aktorin kryesor, mazhorancën, thënë ndryshe kreun e saj Rama, që edhe pse në konflikt të hapur me të, është ai njeriu me të cilin bisedohet e negociohet, në emër të zgjidhjes së krizës.
Në këtë pikë, ai përçon mesazhin se nuk e njeh qeverinë, ose thënë ndryshe mazhorancën që qeveris, ndonëse prej saj është sot në detyrën e lartë të Presidentit të Republikës.
Dhe njeh nga ana tjetër, duke tentuar t’i mbajë faktorë, ata që me rregulla sistemi nuk duhet të njihen si të tillë, pasi kanë goditur sistemin duke zgjedhur të dalin jashtë tij. /tesheshi.com/
