Kryeparlamentari i Shqipërisë, Ilir Meta, pretendon se ka arritur t’i bindë krerët e politikës kosovare që të ulen së bashku në një tryezë bisedimesh për t`i dhënë një zgjidhje krizës politike, dhe posaçërisht asaj parlamentare që ka ngërthyer Kosovën ç`prej katër muajsh.
Meta tha për Top Channel se është i kënaqur që palët janë pajtuar që të rivendosin dialogun, të cilën do e udhëheqë presidentja Jahjaga.
“Përmes presidentes Jahjaga, ky proces do të lehtësohet në mënyrën më të mirë të mundshme. Do të prodhojë rezultate të qëndrueshme dhe të pranueshme nga të gjithë”.
Për Metën, dialogu do të nisë shumë shpejt.
Kjo është hera e parë që kreu i LSI-së, aktualisht dhe kreu i Kuvendit të Shqipërisë, ndërmerr një “aksion diplomatik” për të pajtuar politikën kosovare. Me këtë hap, ai ka rritur fort kreditet e tij politike.
Ditët në vijim, do të shihet nëse Meta do rezultojë më produktiv se sekretari Kerry, i cili nga ana e tij bëri të qartë qëndrimin e Uashingtonit mbi krizën dhe palët e përfshira në të, dha direktiva për dialog, por nuk shkoi më tej në ndonjë inisiativë për t’i ulur në tavolinë. /tesheshi.com/
