Ilir Meta është rrekur të sqarojë dhe njëherë qëndrimin e tij rreth çështjes çame, e cila a ka futur tashmë në konflikt me PDIU-në e Shpëtim Idrizit. Pas kthimit nga vizita treditore në Greqi, ai, në një intervistë për Ora Neës, tha se vijon të ketë po të njëjtin qëndrim rreth çështjes në fjalë, ku potencoi në fund të drejtën e pronës për çamët e përzënë:
“Mendoj se nuk ka asnjë ndryshim të qëndrimit tim ndaj çështjes çame. Ky qëndrim është bërë i ditur prej kohësh. E theksoj edhe një herë tjetër, se zgjidhja e kësaj çështjeje nuk mund të bëhet në mënyrë të njëanshme, as nga unë dhe asnjë nga një përfaqësues tjetër i Shqipërisë, madje as nga e gjithë Shqipëria së bashku për të qenë realist zgjidhja e çdo çështjeje që mbartet nga e kaluara kërkon një mirëkuptim të dyanshëm. Asnjë zgjidhje nuk vjen në mënyrë të njëanshme dhe për këtë duhet një klimë sa më pozitive në këto marrëdhënie.
Kjo çështje duhet trajtuar si domosdoshmëri për t’i përmirësuar më tej marrëdhëniet me Greqinë në të ardhmen, në një plan më afatgjatë dhe strategjik dhe jo thjesht për t’i konfrontuar këto marrëdhënie. Mendoj se është shumë e rëndësishme qasja ndaj këtij problemi dhe akoma më i rëndësishëm se retorika është rruga e instrumenteve që do të ndihmojë në zgjidhjen e të drejtave të shqiptarëve të përzënë me forcë nga trojet e tyre, ku një e drejtë e padiskutueshme është ajo e pronës”.
Vizita e Metës në Greqi, është parë dhe si një diversion brenda koalicionit qeveritar. Kryeparlamentari u shfaq si kalorës i përmisimit të marrëdhënieve me fqinjët jugore, pas një ftohjeje që po i karakterizon ato me Ramën gjatë tre viteve të qeverisjes së këtij të fundit. /tesheshi.com/
