Presidenti Meta s’e ka ruajtur dot konstumin kushtetuese të kreut të shtetit dhe para një zyrtareje të lartë të Brukselit. Komisionerja Europiane për Çështjet e Brendshme, Ylva Johansson vizitoi Tiranën, duke u takuar me të gjithë krerët politikë, në kuadër të përgatitjeve për zgjedhje dhe çështjeve të tjera integruese.
Por në emër të Brukselit, ajo përcolli mesazhin e nxehtë se Reformë në Drejtësi pi ecën.
“Unë jam shumë e kënaqur që po shohim që reformat e mëdha në vend, si ajo në drejtësi që po funksionojnë”, deklaroi Johansson.
Nga ana tjetër, pas takimit me Metën, ku mesazhi i mësipërm djeg më shumë, ai deklaroi, tipikisht si lojtar politik e jo president: “Pas zgjedhjeve të 25 prillit 2021, krimi i organizuar do të marrë goditje të prerë dhe Shqipëria do të kthehet në shinat e shtetit ligjor dhe të respektimit të plotë të të drejtave të njeriut”.
Johansson u takua dhe me kryeministrin Rama, kreun e opozitës Basha, si dhe me kryenegociatorin Zef Mazi.
Ky i fundit shpalosi atë që u trajtua në takimin mes tyre, në zyrën e të parit të qeverisë.
“Sot kryeministri pati kënaqësi që të presë në një takim komisioneren për çështjet e brendshme në BE, zonjën Johansson, me të cilën pati një diskutim të hapur mbi bashkëpunimin tonë të deritanishëm me BE, rreth gjithë gamës së çështjeve që përfshirin tematika e çështjeve të brendshme. Kjo vizitë zhvillohet në kohën e duhur, me një fokus të rëndësishëm për Shqipërinë. Shqipëria është në prag të anëtarësimit në BE. Çështjet që diskutuan kryeministri me komisioneren kanë ndikim në përparim tonë përpara.
Kryeministri dhe komisonerja ranë dakord se bashkëpunimi i ngushtë mes Shqipërisë dhe BE, bazohet jo vetëm tek vlerat e përbashkëta që ndajnë, por te interesi ynë i ndërsjelltë, për më shumë siguri për qytetarët tanë. Kryeministri evidentoi listën e gjatë të arritjeve të shënuara nga autoritetet tona. U prekën aspekte të rëndësishme, bashkëpunim policor, me agjencitë ligjzbatuese të BE, çështjet e kontrollit ndërkufitar dhe çështjet e emigracionit”, shkroi Mazi.
Ndërsa Basha, impresionet e tij pas takimit me zyrtaren e lartë europiane, i përcolli me bindjen se pas 25 prillit do jetë ai në krye të qeverisjes.
“Mora dhe angazhimin e komisioneres për të vazhduar për të ndihmuar Shqipërinë, ku pa dyshim ajo që do të bëjë ndryshimin është vullneti politik, i imi, i PD-së dhe i koalicionit tonë”, tha Basha. /tesheshi.com/
