Në deklaratën e parë të tij gjatë ditës së parë të vizitës në Greqi, kryetari i Kuvendit Ilir Meta, ka bërë thirrje për zgjidhje me maturi të çështjeve të trashëguara nga e kaluara për hir të së ardhmes .
“Besoj se është koha për të gjithë faktorët politikë në Greqi e Shqipëri për t’u përqëndruar tek e ardhmja e përbashkët dhe të fokusohen tek çështjet që trashëgohen nga e kaluara, për të cilat ne nuk jemi përgjegjës, por jemi përgjegjës për të ardhmen”, tha Meta.
Kjo vizitë e kreut të Kuvendit në fqinjin jugor vjen në një kohë kur raportet mes Athinës dhe Tiranës janë të ftohta. Kjo për shkak të mbetjes pezull të marrëveshjes detare sidomos. Por ndërkohë, edhe Rama gjatë tre viteve të qeverisjes së tij nuk është treguar fort i dashur me Greqinë.
Reforma elektorale që e bëri njësh Himarën ortodokse me Labërinë muslimane, si dhe më pas një kishë e shembur në Dhërmi nga ndërtimorët, solli deri dhe mallkimin e kryeministrit shqiptar nga ana e priftit të Konicës.
kjo ftohje sakaq, është reflektuar dhe në prishjen e aleancës, por dhe miqësisë mes Ramës dhe Dules.
Dhe Ilir Meta, duket se ka marrë rolin e një ndërmjetësi për t’i ngrohur disi këto raporte të ftohura mes dy vendeve. /tesheshi.com/
