Presidenti Meta i është vërsulur qeverisë dhe për rastin e Maternitetit të Tiranës, u shembur në një pjesë për t’u rikonstruktuar, duke parë në të Teatrin Kombëtar.
“Ndërhyrja brutale mbi godinën historike të maternitetit ‘Mbretëresha Geraldinë’, pa transparencë, në periudhë pandemie, është një tjetër atentat, në vijim të sulmeve barbare ndaj historisë, trashëgimisë kulturore dhe identitetit tonë kombëtar.
Shkatërrimi kriminal i Teatrit Kombëtar, rrafshimi i qindra objekteve me status special e monument kulture, si dhe ‘zhdukja’ e Sahatit pas kullave, janë dëshmi e babëzisë dhe të një gjenocidi kulturor ndaj identitetit të Kryeqytetit tonë, në shkelje të Kushtetutës, ligjit për konsultimit publik dhe të gjitha parimeve për mbrojtjen e vlerave të trashëgimisë historike e kulturore.
Duke u solidarizuar me qëndrimin e Unionit të Arkitektëve, Urbanistëve dhe Planifikuesve të Shqipërisë për çështjen e ndërhyrjes mbi godinën e maternitetit ‘Mbretëresha Geraldinë’’, u premtoj të gjithë shqiptarëve se pas 25 prillit në Shqipëri do të nisë epoka e referendumeve, për t’u dhënë të drejtën qytetarëve të vendosin vetë mbi të gjitha çështjet e rëndësishme me interes publik”, shkruan Meta.
Nga ana tjetër, ndryshe nga rasti i Teatrit Kombëtar, për Maternitetin nuk ka reagim mjekësh, siç pati reagim aktorësh, ndërkohë që s’pati sigurisht reagime sportistësh për stadiumin “Qemal Stafën”. Rasti i stadiumit, sot “Air Albania”, nuk është përmendur as më sipër te shfrimi politik i Metës.
Sipas shpjegimit të qeverisë, ajo pjesë e shembur e maternitetit thjesht do rikonstuktohet siç ka qenë, pasi është dëmtuar rëndë nga tërmeti. /tesheshi.com/
