Nga Shkupi, kryeministri Rama përcolli një mesazh për liderët e rajonit. Ai ndodhet në kryeqytetin maqedon për një samit me ta dhe, paraprakisht, u ka përcjellë këto fjalë:
“Duhet të them që ky është një takim shumë i rëndësishëm. Jemi këtu për të bërë bashkë mendimet tona me përfaqësuesit e BE dhe administratën amerikane për një hap të rëndësishëm që duhet të ndërmarrim në afrimin drejt BE.
Kjo është rreth planit të ri të rritjes dhe integrimin në tregun ndërkombëtar, çka ka qenë e mundur deri tani vetëm për vendet anëtare të BE.
Është një ndryshim i madh dhe një mundësi që nuk duhet ta humbim. Ndaj është thelbësor që të punojmë së bashku gjashtë vendet e Ballkanit, të vëmë të parët qytetarët dhe të lëmë politikat dhe historinë për herë tjetër. Sepse gjithçka që mund të bëjmë për të bërë gjërat në muajt në vijim, do të përcaktojë se si do duken vendet tona”.
Mesazhi i Ramës ngjan tejet idilik në një kohë të trazuar tërmetesh gjeopolitike me era luftë, e cila nuk përjashton as Ballkanin, me një Serbi që nuk heq dorë nga ambiciet e saj në të cilat investon dhe Rusia. Është një samit ku merr pjesë dhe Kurti e Vuçiç.
Me dy emisarë perëndimorë, nga SHBA dhe BE, samiti është pjesë ambicies së Perëndimit për të mbajtur Ballkanin nën kontroll. /tesheshi.com/
