Lëvizja e llahtarshme demografike që ka pësuar Shqipëria në gati çerek shekulli, ka bërë që ashtu siç disa zona e treva të thella të mbeten të braktisura, po ashtu dhe ca ta të tjera të kthehen në geto, për shkak të përqëndrimit aty të të ardhurve. Pra, është fjala për fenomenin “Bathore”, që sigurisht nuk haset vetëm në Bathore, por gjithkund në zonat e ulëta, fushore ose bregdetare.
Dhe një prej tyre është Fushë Kuqe në Kurbin, ku që pas 91-it, janë ngulitur aty shumë familje të zbritura nga veriut, përgjithësisht nga Puka, Mirdita, Kukësi e Tropoja. Ata kanë zënë fushat e kësaj komune, duke ndërtuar fillimisht baraka për banim, me synimin e mëtutjeshëm për të ngritur shtëpi normale.
Zona më e njohur me këto ngulmime është Gorreja dhe Paraqati, që ish- punonjësit e sektorit bujqësor aty i kanë pagëzuar dhe me emra të tjerë si Plepishtë dhe Gjoli i zi.
Nuk dihet numri i saktë i të ardhurve në këtë zonë tërësisht bujqësore, ndërsa prania e tyre bie në sy për nivelin e rëndë social ku u ka rënë të jetojnë. Ja, 40-vjeçari Preng Lleshi i ardhur nga një fshat i thellë i Pukës thotë se dy nga tre fëmijë që ka, është detyruar t`i çojë në një institucion social, pasi nuk mundet t`i ushqejë.
Ndërsa një tjetër i moshuar ankohet për mungesën e infrastrukturës. Por problem mbi problem, është konflikti për tokën. Sepse, disa nga të ardhurit pretendojnë se tokën ku janë vendosur e kanë blerë vite më parë, ndërkohë që banorë të atyshëm vijnë dhe i kërcënojnë për zaptim prone.
Por ka dhe ankesa që ngjajnë si qesharake në raport me mizerjen që jetojnë përditë të ardhurit, ndonëse kanë braktisur vendet e tyre me shpresën për një jetë më të mirë. Një nga ata ankohet se fshati i krijuar prej tyre nuk ka emër! Po po, sipas tij fshati nuk ka emër dhe në raste gëzimesh apo hidhërimesh, të afërmit e tyre nuk mund të gjejnë shtëpitë ku ndodhen tashmë.
Dhe ata duan që dhe zyrtarisht fshati të quhet Fshati i Ri, duke besuar që pas kësaj, jeta e tyre do marrë për mirë: hallet do u pakësohen dhe ca ëndrra që morrën me vete prej kur zbritën nga mali për t`u ngulitur fushave, do bëhen realitet.
Përgatiti: Ahmet Zani – tesheshi.com
