Kancelarja gjermane Angela Merkel do të jetë të hënën në Ankara për të diskutuar me autoritetet turke mbi krizën e refugjatëve. Kjo është vizita e dytë e saj në Turqi në pak muaj, pas asaj të zhvilluar në tetor, ndërsa dy vendet po mbajnë një peshë kryesore në administrimin e krizës së refugjatëve.
Merkel ka për t’u takuar me kryeministrin Ahmet Davutogllu, me të cilin do të diskutohen përpjekjet për frenimin e vërshimit të refugjatëve në Europë. Kjo do të jetë dhe tema kryesore e dy udhëheqësve që patën një takim të shkurtër dy ditë më parë në Londër, gjatë zhvillimit të një konference të donatorëve për Sirinë.
Gjithashtu kanë për t’u diskutuar dhe mënyrat e ndalimit të kalimit të refugjatëve nëpër Egje. Turqisë i janë premtuar nga BE-ja tre miliardë euro si një paketë ndihme në shkëmbim të frenimit të refugjatëve që të kalojnë në vendet europiane, por rezultatet shihen ende të pakënaqshme nga një numër zyrtarësh të Brukselit.
Procesi i anëtarësimit të Turqisë në BE, si dhe marrëdhëniet dypalëshe, do të zënë vend në bisedimet që do të zhvillojë Merkel në vizitën njëditore. Mënjanë nuk do të mbetet dhe lufta në Siri, e posaçërisht operacionet ushtarake të Rusisë në veri të vendit. /tesheshi.com/
