Kancelarja gjermane Angela Merkel do të vizitojë Shqipërinë në muajin korrik. Kështu bëhet e ditur nga një burim zyrtar i Berlinit, i cili i ka thënë një televizioni të Sarajevës se përpara Konerencës së Vjenës për Ballkanin kancelarja gjermane do të zhvillojë një tur ballkanik.
Merkel fillimisht do të vizitojë Tiranën dhe Beogradin, kurse më pas do të qëndrojë në Sarajevë, ku do të marrë pjesë në dërgimin e eshtrave të banorëve të vrarë në masakrën e Srebrenicës.
Deri tani nuk është konfirmuar se kancelarja gjermane a do të qëndrojë edhe në Shkup. Gjermania ishte një nga vendet e para të Bashkimit Evropian që kërkuan hetim ndërkombëtarë për ngjarjet e Kumanovës.
Shqipëria është i pari vend ballkanik që do të prekë zonja Merkel, e cila pritet të shpallë financimin e projekteve të mëdha për vendet e rajonit, të cilat do të miratohen në Konferencën e Vjenës që do të mbahet në muajin gusht. Vizita e zonjës Merkel ishte planifikuar që vitin e shkuar kur Kryeministri shqiptar, Edi Rama zhvilloi një vizitë zyrtare në Gjermani. Por koha është lënë nga kanalet diplomatike pas zgjedhjeve lokale të 21 qershorit në mënyrë që të mos influencohet politikisht.
