Kancelarja gjermane, Angela Merkel, njoftoi se Rusia nuk do të marrë pjesë në takimin e G7-ës muajin e ardhshëm. Merkel e quajti të “paimagjinueshëm” një kthim të Rusisë në mesin e shtatë vendeve të industrializuara për sa kohë që ajo shpërfill ligjin ndërkombëtar në Ukrainë.
Deklaratat e kancelares gjermane u bënë një ditë para pjesëmarrjes së saj në Samitin e Partneritet Lindor që do të mbahet në Riga të Letonisë. Me këtë rast ajo kërkoi gjithashtu ta qetësojë Moskën në lidhje me ish-vendet sovjetike, duke u shprehur se projekti i Partneritetit Lindor nuk ishte një instrument i zgjerimit të BE-së.
Duke iu kthye lënies jashtë të Rusisë nga G7-ta, Merkel tha se, “Ne kemi parë ndërkaq aneksimin e Krimesë nga Rusia, në thyerje të ligjit ndërkombëtar. Kemi parë destabilizimin masiv të Ukrainës lindore. Kemi parë si rendi paqësor i Europës u vu në diskutim.”
Ajo e quajti G7-ën një bashkësi vlerash, e për këtë arsye Rusia do të qëndronte jashtë saj.
G8-ta u kthye në formatin G7 vitin e shkuar, pas aneksimit të Krimesë nga Rusia, gjë që solli zhvendosjen e takimit të shtatë vendeve të industrializuara nga Soçi në Bruksel.
Ministri i jashtëm rus, Sergei Lavrov, pati reaguar ashpër asokohe, duke thënë se askush nuk mund ta përjashtonte Rusinë nga G8-ta.
“G8-ta është një klub informal, askush nuk jep karta anëtarësie, e askush nuk mund të përjashtojë anëtarë,” qenë fjalët e tij.
G7-ta ka në gjirin e vet SHBA-të, Britaninë, Japoninë, Gjermaninë, Italinë, Francën dhe Kanadanë.
