Kancelarja gjermane, Angela Merkel paralajmëroi se zgjidhja për krizën e refugjatëve është ende shumë larg, e deklaroi se mënyra sesi do të menaxhohet kjo krizë do t’i japë formë Europës në terma afatgjatë.
Ajo tha përpara deputetëve gjermanë se masat e dakordësuara së fundmi në samitin e liderëve të BE-së janë një “hap i parë”, por rishpërndarja e refugjatëve nuk është e mjaftueshme. Fluksi i refugjatëve në kufijtë e Bashkimit Europian nuk ndalet. Hungaria njoftoi për një numër rekord të ardhurish të rinj në territorin e saj, 10046 persona në një ditë të vetme.
Por, nuk ndalen as konfliktet që ka nxitur kriza mes shteteve europiane, më e fundit shënohet mes Serbisë dhe Kroacisë.
Alarmin e ka dhënë edhe Komisioni Europian i cili paralajmëroi se nëse kriza nuk adresohet si duhet, mund të ketë një rritje të ekstremizmit të krahut të djathtë në të gjithë Europën.
Europa përjeton krizën më të madhe të refugjatëve që nga lufta e Dytë Botërore, me rreth 500 mijë persona që kanë mbërritur në kufijtë e saj vetëm brenda këtyre muajve të vitit.
Kancelarja Merkel tha në parlament se është e bindur se ajo që i nevojitet Europës nuk është thjesht rishpërndarja selektive e refugjatëve, por një proces i përhershëm për shpërndarje të drejtë të refugjatëve mes vendeve anëtare.
“Kemi hedhur një hap të parë, por jemi ende shumë larg nga ku duhej të ishim”, tha Merkel. /tesheshi.com/
