Krerët e Bashkimit Evropian paralajmërojnë se dështimi për të lehtësuar krizën në Kosovë “do të ketë pasoja negative”, dhe për të shmangur këtë, kërkojnë zgjedhje të menjëhershme në veri dhe vazhdimin e dialogut ndërmjet Serbisë dhe Kosovës, zbatimin të Marrëveshjes së Ohrit, e cila përfshin formimin e një bashkësie të komunave serbe.
Kështu thuhet në draft-konkluzionet e seancës të krerëve të shteteve apo qeverive të BE-së në Bruksel.
Paralajmërimi vjen dy ditë pasi zyrtari i Komisionit Evropian Jan Gert Koopman tha të martën se organi do t’u propozonte një listë sanksionesh autoriteteve në Prishtinë për mospërmbushje të kërkesave për de-përshkallëzimin në veri të Kosovës.
Në përfundimin e fundit të krerëve të shteteve apo qeverive të BE-së, ata dënojnë “incidentet e fundit në veri të Kosovës dhe bëjnë thirrje për ulje të menjëhershme të tensionit”.
Dokumenti shton se Serbia dhe Kosova “duhet të krijojnë kushte për zgjedhje të menjëhershme në të katër komunat në veri të Kosovës” dhe thekson se “mos relaksimi i tensioneve do të ketë pasoja”.
“Është e një rëndësie thelbësore vazhdimi i dialogut (Serbia dhe Kosova) me ndërmjetësimin e BE-së, të udhëhequr nga përfaqësuesi i lartë i Unionit, dhe me zbatimin e qetë të Marrëveshjes për rrugën e normalizimit të marrëdhënieve”, thuhet në dokumentin përgatitor të samitit të BE-së dhe nënvizon se “kjo përfshin themelimin e një asociacioni/bashkësie të komunave me shumicë serbe”.
Krerët e Bashkimit Evropian gjithashtu “përsërisin mbështetjen e tyre të plotë dhe të parevokueshme për perspektivën e Ballkanit Perëndimor për anëtarësimin në BE dhe përshpejtimin e procesit të anëtarësimit”.
Tensionet më të këqija etnike
Në javët e fundit, Kosova ka përjetuar tensionet më të këqija etnike që nga shpallja e pavarësisë nga Serbia në vitin 2008.
Dhuna shpërtheu në fund të majit pasi kryetarët e katër komunave, shqiptarë etnikë, morën detyrën pas zgjedhjeve lokale në të cilat pjesëmarrja ishte vetëm 3.5 përqind pasi serbët bojkotuan votimin.
Rreth tridhjetë paqeruajtës të NATO-s që mbronin tre komuna në veri u plagosën në përleshjet me protestuesit serbë në fund të majit.
Partneri kryesor strategjik i Kosovës, Shtetet e Bashkuara dhe Bashkimi Evropian, i kanë bërë thirrje kryeministrit Albin Kurti që të tërheqë kryetarët e komunave dhe të largojë policinë speciale të përdorur për instalimin e tyre ose të përballet me pasojat.
Tensionet e reja mund të nxiten edhe më tej nga shpallja e dy grupeve serbe si “organizata terroriste” të enjten nga qeveria e Kosovës.
Kryeministri Albin Kurti tha në seancën e kabinetit se grupet e “Mbrojtjes Civile” dhe “Brigadës Veriore” paraqesin një nivel të lartë “kërcënimi dhe rreziku”.
Ai tha se të dy grupet “rekrutonin dhe trajnuan anëtarët se si të përdorin armët dhe të kryejnë metoda të tjera luftarake në bazat ushtarake në Serbi për të kryer sulme ndaj institucioneve vendore dhe ndërkombëtare në Kosovë”.
Por njëherësh, kryeministri Kurti prezantoi katër hapa për de-përshkallëzimin e situatës në veri të Kosovës, që përfshin reduktimin e pranisë së policisë së Kosovës në ndërtesat komunale dhe rrethinat e tyre, në një video të publikuar pak para fillimit të samitit të Bashkimit Evropian.
Deri më tani nuk është e qartë nëse pala tjetër, përfshirë Beogradin, por edhe Brukselin, do ta pranojnë propozimin e Kurtit. /tesheshi.com/
