Reagimi i Beogradit zyrtar nuk ka ardhur ende për zgjedhjen e Hashim Thaçit president, ndërkohë mediat serbe i kanë dhënë një hapësirë të konsiderueshme mbulimit të ngjarjeve në Prishtinë, si zgjedhjes së kreut të ri të shtetit ashtu edhe trazirave në kryeqytet.
Të bie në sy që edhe gazetat më ekstreme në raste të tjera, këtë herë e kanë trajtuar ftohtë, madje, madje më shumë se korrekte nëse e sheh me vëmendje.
Përshembull, e përditshmja më e madhe “Blic” ka botuar një profil të AFP-së ku thekson se “gjapri” u transformua nga ushtarak në politikan. Por kjo është njëra pjesë, sepse në rreshtat e shkrimit nuk thuhet “predsednika Kosovo” por predsednika Kosova. Nuk është thjesht një zanore, por ata që e njohin mirë simbolikën zyrtare serbe e dinë çfarë përfaqëson o-ja në fund të Kosova, ndaj dhe zanorja a është e rëndësishme pasi kështu i themi ne shqiptarët.
Por përvç këtij aspekti, mediat e Beogradit e theksojnë, siç dhe pritej, faktin se votat e Listës Serbe ishin të gjitha për Thaçin.
E përditshmja serioze “Danas”, thekson se “Seanca e djeshme filloi me një orë vonesë, me praninë e ambasadorit amerikan në Kosovë Greg Delavvvi dhe përfaqësuesit të BE-së Samuel Zhbogar. Në mesin e deputetëve të pranishëm ishin përfaqësues të Listës Serbe, dy ministra serbë në qeverinë e Kosovës, Ljubomir Mariq dhe Dalibor Jevtiq, dheb zëvendëskryeministri Branimir Stojanoviq”.
Ndërkaq, televizioni më i madh në vend B92, kishte dërguar në Prishtinë një nga gazetarët kryesor i cili me lidhje direkte në edicionin qendror të lajmeve dha raportin e zgjedhjes së Thaçit president.
B92, në mënyrë të detajuar ka raportuar të gjitha ngjarjet përpara, gjatë dhe pas zgjedhjes së Hashim Thaçit. Ky televizion, si detaj për të nënvizuar thekson se “përkrahësit e Thaçit pas fitores dolën me flamujt e Shqipërisë dhe SHBA-së. Edhe B92 përdor në një vend zanoren a, duke shkruar Kosova.
Mediat e rëndësishme të Serbisë nënvizojnë faktin se komuniteti ndërkombëtar e ka mbështetur Thaçin që në paktin e tij të gjatë me Isa Mustafën pas zgjedhjeve parlamentare.
Ndërkaq, e përditshmja e vjetër “Politika”, thekson në kryeartikull se “Thaçi u zgjodh President me kuorumin e domosdoshëm të deputetëve serbë” /tesheshi.com/
