Mediat italiane kanë dhënë alarmin se të mitur shqiptarë, pasi udhëtojnë drejt vendit fqinj me prindër apo të afërm të tyre, qëndrojnë në Itali, ku deklarohen si të vetëm, pa përkrahje. Në këtë mënyrë ata përfitojnë kujdesin e institucioneve lokale, që janë të detyruar t´I kenë në kontroll.
Më konkretisht Il Giornale D´Italia shkruan se ky është një nga mekanizmat që po përdoren nga shqiptarët dhe të tjerë për të qëndruar ilegalisht në Itali.
Gazeta publikon edhe një shifër, 5190 të mitur të cilët kanë hyrë në Itali dhe janë deklaruar si të braktisur.
Udhëtimi nis me qëllim turistik, por sapo shkelin në territorin Italian, të miturit dorëzohen pranë autoriteteve, të cilat nuk mund të veprojnë njëlloj si në rastin e emigrantëve të rritur të paligjshëm.
Ata merren në administrim nga komunat apo institucionet vendore, çka i siguron për një periudhë kohe qëndrimin në Itali. Kjo i bën të mundur që të nisin shkollën ose punësohen.
Kryesisht të miturit janë djem që përmes autobuzëve të nisur nga Shqipëria mbërrijnë në Veneto ku dhe qëndrojnë.
Janë disa mijëra fëmijë nga vendet e Ballkanit që për disa muaj kanë zgjedhur këtë rrugë për të qëndruar në Itali, duke i shpëtuar deportimeve, sikundër ndodhin me të rriturit. /tesheshi.com/
