Dymbëdhjetë orë betejë midis policëve indianë dhe tre personave të armatosur që sulmuan një stacion policor në Dinanagar, në distriktin e Gurdaspurit, përfunduan me së paku dhjetë të vdekur, mes të cilëve tre policë dhe tre civilë.
Tre mësymësit e paidentifikuar, të cilët u vranë nga policia gjatë rrethimit, qëlluan fillimisht mbi një civil, duke e lënë të vdekur, dhe më pas tentuan të rrëmbejnë një autobus, para se të sulmojnë rajonin policor.
Burimet policore thonë se tre personat e armatosur hynë në Indi nga Pakistani dy ditë më parë, duke paralajmëruar një rritje rishtas të tensioneve mes dy shteteve fqinje nëse pretendimi i mësipërm rezulton të jetë i vërtetë.
Një sulm i tillë ishte i pari në Panxhab pas 13 vitesh, e po ashtu u cilësua si më i rëndi që nga vitet 1990.
Mbetet ende e paqartë se kush qëndron pas sulmit. Udhëheqësi i separatistëve kashmiras, Sajed Salahuddini, e mohoi faktin që sulmin ta kishin kryer njerëzit e tij.
Qeveria pakistaneze e ka dënuar sulmin me një deklaratë, ku mes të tjerash thuhet, “Pakistani përsërit dënimin prej tij të terrorizmit në të gjitha format dhe manifestimet.”
Marrëdhëniet mes Indisë dhe Pakistanit kanë qenë tradicionalisht të tensionuara, por një bisedë kokë më kokë e dy kryeministrave, përkatësisht mes Narendra Modit dhe Navaz Sharifit, javë të shkuara në një takim në Rusi patën ngjallur shpresat për një përmirësim të tyre. /tesheshi.com/
