Në orën 20:00, u mbyllën qendrat e votimit në Katalonjë, ku banorët u deklaruan gjatë së dielës për pavarësinë e tyre, pavarësisht ndalimit të referendumit dhe ndërhyrjes së policisë, që la 760 të plagosur, përfshirë 12 policë. Gjatë natës priten komentet e presidentit katalan Carles Puigdemon dhe shpallja e rezultateve, të cilat qeveria spanjolle nuk do t’i njohë.
Vetë referendumi ishte kundër kushtetutës spanjolle. Policia spanjolle njoftoi se kishte mbyllur 92 shkolla që nga mëngjesi, ku ishin vendosur kutitë e votuesve, pas mosreagimit të policisë autonome katalane. Avokati i shtetit mund të ngrejë një padi kundër kësaj “policie politike”, shkruan gazeta El Pais, duke iu referuar burimeve në gjyqësor.
Qeveria rajonale njoftoi të dielën në mbrëmje se policia mbylli 319 qendra votimi. Qeveria katalanase po planifikonte të votonte në 2300 vendvotime, por mbeti e panjohur se sa prej tyre kanë mbetur hapur.
Në përpjekje për të shpërndarë turmën e ithtarëve të referendumit që bllokuan hyrjet e qendrave të votimit me rezistencë paqësore, policia ka përdorur plumba dhe shkopa gome, duke lënduar qindra qytetarë.
Në konflikt, nëntë policë u plagosën dhe katër persona u arrestuan, një prej të cilëve ishte i mitur. Ndihma mjekësore është kërkuar nga 760 persona, sipas shërbimit mjekësor katalanas. Zëdhënësi i qeverisë katalane tha se qeveria spanjolle do të përgjigjet para organeve ndërkombëtare për dhunën e ushtruar.
“Shteti spanjoll është kompromentuar shumë dhe do të përfundojë në gjykatat ndërkombëtare”, tha Jordi Turull në një konferencë shtypi. Ai shtoi se pason numërimi i miliona votave, por nuk e dinte kur do të përfundojë i gjithë procesi. /tesheshi.com/
