Gjermania i detyrohet Greqisë rreth 278 miliardë euro reparacione të Luftës së Dytë Botërore. Ky është pretendimi i fundi i Athinës që i referohet shkatërrimeve dhe dëmeve që pësoi vendi gjatë pushtimit nazist. Shuma në fjalë e kalon borxhin aktual që Greqia i detyrohet Bashkimit Europian, 240 miliardë euro.
“Sipas përllogaritjeve tona, borxhi i lidhur me reparacionet gjermane është 278.7 miliardë euro, përfshi 10.3 miliardë të të ashtuquajturës “kredi” – ka deklaruar zëvendësministri grek i financave, Dimitri Mardas.
Shifra është përllogaritur nga një Komision Parlamentar dhe Gjykata e Lartë greke. Shifrat e mëparshme kanë variuar mes 269 miliardë euro dhe 332 miliardë. Ndërkohë, sipas të njëjtit burim, në Konferencën e Parisit të vitit 1946 shifra e reparacioneve u vendos 341.2 miliardë.
Deklarata vjen pak para vizitës së kryeministrit të vendit Alexis Tsipras në Moskë dhe takimit të tij me presidentin rus Vladimir Putin, të mërkurën në Kremlin. Gjatë këtij takimi, kryeministri i ri pritet që të nxisë dhe forcojë më tej bashkëpunimin e vendit të tij me Rusinë. Një nga pikat e diskutimit mes dy lidërve në Moskë, do të jetë edhe mundësia e një kredie nga ana e Rusisë, apo negocimi i uljes së çmimit të gazit si dhe heqja e embargos për disa produkte greke.
Parlamentarët grekë votuan të martën në favor të ngritjes së një komisioni të veçantë për shqyrtimin e rrethanave që e çuan vendin drejt marrjes së paketës së shpëtimit nga ana e kreditorëve ndërkombëtarë: Bashkimit Evropian, Fondit Monetar Ndërkombëtar dhe Komisionit Evropian.
“Pas 5 vitesh heshtjeje parlamentare në lidhje me shkaqet kryesore që na çuan në këtë situatë të rëndë ekonomike, sot do të fillojmë një proçedurë që do t’u japë përgjigjie pyetjeve që shqetësojnë popullin grek” – ka deklaruar kryeministri i vendit. Çështja e reparacioneve të luftës ka shumë shanse që të shtojë edhe më shumë tensonet mes Athinës dhe Berlinit që janë ndërkohë në nivele kritike në lidhje me kërkesën e Greqisë për negocim të kushteve të borxhit prej 240 miliardësh.
Çështja e reparacioneve të luftës ka marrë një vrull të madh në Athinë veçanërisht gjatë viteve të fundit kur vendi po përballet me vështirësi financiare. Pikërisht partia në pushtet Syriza vendosi që këtë çështja ta ngrejë edhe në Berlin.
Kujtojmë se akti i pari që veproi Tsipras pasi nisi punën si kryemnistër, ishte një vizitë-homazh në varrezat e të rënëve gjatë pushtimit nazist, që ishte mjaft e qartë në mesazhin e vet drejtuar Berlinit.
