I ftuar në Top Story, ministri i Rendit, Saimir Tahiri është rrekur të shpjegojë dhe njëherë se qeveria ku ai bën pjesë, si dhe policia që ai drejton, po e luftojnë fuqishëm fenomenin e kultivimit dhe trafikimit të kanabisit.
I vetëm përballë moderatorit Sokol Balla, Tahiri ka patur qetësinë dhe komoditetin e nevojshëm për të paraqitur shifrat dhe përshtypjet e raporteve ndërkombëtare lidhur me drogën në vite sa i përket Shqipërisë, ku siç konkludoi, ato tregonin për arritje në këto tre vjet.
Tahiri e ka parë në këtë prizëm edhe shfaqjen e avionëve për trafikim, pra si shkak i intensifikimit të luftës së policisë. Në gjykimin e tij, gjersa ka shkuar puna deri tek përdorimi i avionëve, kjo tregon se rrugët e trafikimit janë ngushtuar së tepërmi.
Sakaq, tek Dritare-ja e Rudina Xhungës në Vizion Plus , ishin të ftuar po për drogën, zëvëndësministrat e Rendit dhe të Mbrojtjes, respektivisht Stefan Çipa e Petro Koçi, ku përballë tyre qëndronte ish-ministri demokrat i Rendit, Flamur Noka.
Pjesa më interesante e emisionit ishte kur ky i fundit thotë se kishte parë parcela të mbjella me kanabis në Konispol. Kjo ka shkaktuar irritimin e zëvëndësministrit Çipa, ish-deputet i asaj zone, i cili tha se Noka ka ngatërruar mandarinat me kanabisin, meqë ajo zonë mbahet si hambari shqiptar i mandarinave. /tesheshi.com/
