Byroja Qendrore Palestineze e Statistikave ka publikuar një numër shifrash pak ditë para përvjetorit të 67-të të “Nakba”-së, apo “Katastrofës”, ditës kur palestinezët sjellin në mendje me lot në sy themelimin e Izraelit në vitin 1948.
Ky organizëm ka regjistruar një popullsi prej 12.1 milionë banorësh, 4.6 milionë prej të cilëve jetojnë në territoret e pushtuara, e pjesa tjetër jashtë.
Kështu, shifrat tregojnë se 2.8 milionë palestinezë jetonin në Bregun Perëndimor, e 1.8 milionë në Rripin e Gazës, nga fundi i vitit 2014.
Gjithnjë sipas shifrave të byrosë, 43.1 për qind e 4.6 milionë banorëve në territoret palestineze janë refugjatë.
Pjesa tjetër, rreth 7.5 milionë palestinezë, jetojnë në mërgim, e shumica e tyre është strehuar në 31 kampet e refugjatëve të ngritura nga OKB-ja në Jordani, Liban dhe Siri.
Të tjera shifra nga Shoqata për të Drejtat Civile në Izrael tregojnë se palestinezët përbëjnë 37 për qind të popullsisë së Jerusalemit.
Pjesa lindore e Jerusalemit u pushtua më 1967-n, në Luftën e Gjashtë Ditëve, e më vonë u aneksua nga Izraeli.
Jerusalemi Lindor ka qenë vijueshmërisht i tensionuar për shkak të ngulimeve ilegale izraelite, ndërsa 75 për qind e palestinezëve që banojnë në të janë nën kufirin e varfërisë.
Me gjithë kundërshtinë e bashkësisë ndërkombëtare, Izraeli vazhdon ta çojë përpara projektin e ngulimeve, duke shkatërruar shtëpitë e palestinezëve e duke bërë ndërtime për kolonët hebrenj. Numri i këtyre kolonëve është dyfishur gjatë katër viteve të fundit. /tesheshi.com/
