Mazhoranca përcolli mesazhin se do i përgjigjet shqetësimit të opozitës në lidhje me skadimin e kartave të identitetit deri më 25 prill, gjë e cila mund të çojë në mosmundësi votimi.
Më herët, opozita i dërgoi një kërkesë ministrit Çuçi për të oarë mundësinë shtyrjes së afatit të pajisjes me kartë, gjë e cila u komentua nga kryeministri Rama si diçka me sens.
“Kur bëhet fjala për zgjedhjet, zgjedhjet janë të përbashkëta, rregullat janë bashkërisht dhe çdo propozim i arsyeshëm që secila palë bën dhe është në interes të procesi zgjedhor, është i mirëseardhur.
Bën sens dhe do të trajtohet me seriozitetin e duhur që të gjitha palët të jenë të barabarta”, tha Rama.
Pasoi reagimi i ministrit Çuçi po me të njëjtën frymë.
“Kemi marrë njoftimin që kërkojnë shtyrjen, po e shikojmë me shumë vëmendje dhe jam në kontakt me kryetarin e KQZ për të marrë një opinion lidhur me këtë çështje.
Jemi në koordinim të plotë, mund ti garantoj shqiptarët se askush nuk do të mbetet pa votuar për shkaqe që nuk varet nga to.
Po bëjmë të gjitha përpjekjet dhe me kompaninë e ALEAT që zgjedhësit të kenë një dokument jo vetëm si detyrim, por edhe si nevojë për të marrë shërbime. Jemi në një komunikim të vazhdueshëm me kompaninë”, tha ministri i Brendshëm. /tesheshi.com/
