Disa ditë më parë denoncimi në polici i drejtorit të postës së Manzës, që akuzonte një vajzë, Enertila Beqaj, se e kishte mashtruar duke i marrë 60 milionë lekë, vuri në lëvizje policinë dhe u kthye në një lajm qendror nga pothuajse të gjitha mediat.
Denoncuesi pretendonte se i kishte dhënë vajzës shumën e parave në formë dhuratash, apo për të rregulluar shtëpinë, por pa pranuar se e kishte takuar ndonjëherë. Thjesht ai kishte një miqësi në Facebook, i kishte premtuar martesë dhe kjo histori kishte zgjatur për rreth 3 vjet.
Policia ndaloi vajzën, e cila doli para gjykatës për t´u njohur me masën e sigurisë. Ndërkohë që policia po heton për zbardhjen e ngjarjes, duket se nuk është tërësisht e bindur në atë që ka deklaruar 30-vjeçari që drejton edhe postën e Manzës.
Policia ka ngritur dyshimet se Barush Ahmeti nuk i ka shpenzuar të gjitha paratë që pretendon duke i blerë dhurata të dashurës së tij, shkruan Panorama.
Referuar ekspertëve të policisë, kjo gazetë shkruan se “po bëhet një mbledhje e shumës së përgjithshme, por vlera e pretenduar nga denoncuesi është jashtë logjike. Kemi dyshime se ai e ka nxjerrë si justifikim ketë, për të mbuluar diçka tjetër. Ndoshta kërkon të justifikojë lekët te vëllezërit dhe familja e tij, ndaj jemi shumë me dyshime në lidhje me këtë ngjarje. Mbase paratë i ka shpenzuar diku tjetër, me baste a gjëra të tilla, dhe kërkon t’i justifikojë me dhuratat që i ka blerë të dashurës. Kjo ngjarje do të hetohet me imtësi, pasi pretendimet e palëve janë kontradiktore në lidhje me shumën e supozuar 60 milionë lekë”
Edhe rrobat, çantat, këpucët e bizhuteritë e blera së fundmi nga 27- vjeçarja rezultojnë më së shumti mall tregu dhe jo i blerë në dyqane të markave të shtrenjta. / tesheshi.com/
