Sumeja Erdogan, vajza më e re e Presidentit turk Recep Tayyip Erdogan, do të martohet sot me biznesmenin nga industria ushtarake Selcuk Bayraktar, ndërsa pritet që në ceremoninë e dasmës, kumbari i saj të jetë kryeministri turk Ahmet Davutoglu.
Ceremonia e dasmës, në të cilën pritet të jenë prezent 6.000 mysafirë, do të mbahet në Stamboll, njoftojnë mediat duke theksuar se kumbarë nga ana e dhëndrit do të jetë shefi i përgjithshëm i ushtrisë turke Hulusi Akar.
Në fotografitë e publikuara shihet Sumeja Erdogan e ulur në ulësen e përparme të automobilit të dasmës, duke mbajtur shami në kokë, ka transmetuar AFP.
Ardhja e Davutoglu në ceremoninë e dasmës mund të hedhë poshtë zërat në lidhje me konfliktin në mes tij dhe Presidentit turk.
Ai javën e kaluar kishte lajmëruar se do të tërhiqet nga pozita e Kryeministrit dhe udhëheqësit e Partisë për Drejtësi dhe Zhvillim (AKP) në kongresin, i cili pritet të mbahet në fund të këtij muaji.
Besohet se Davutoglu ka qenë i detyruar të lëshojë vendin e udhëheqësit të qeverisë për shkak të mospajtimeve të shpeshta me Erdoganin. /tesheshi.com/
