Kriza politike në Maqedoni, ka çuar në krjimin e një situate të pazakontë, që ndoshta do futet në analet e historisë politike të kohëve moderne. Njëherësh ajo është dhe një situatë antikushtetuese në raport më sistemin klasik shumëpartiak që ka Maqedonia.
Pas tërheqjes së listave për kandidatë të deputetëve nga Partia Social Demokrate e Maqedonisë, dhe mosmënjanimit e parregullsive në afatin e paraparë për dorëzimin e listave për deputet në Këshillin Shtetëror Zgjedhor nga ana e Lëvizjes Popullore të Maqedonisë, VMRO-DPMNE ka ngelur pjesëmarrësi i vetëm në zgjedhjet e 5 qershorit.
Tani, Komisioni Shtetëror Zgjedhor, do të duhet të dërgoj paralajmërim të ri deri tek kryetari i Kuvendit, Trajko Veljanovski për ta njoftuar me situatën e re që është krijuar, ngase është në kundërshtim me Kushtetutën që në sistem shumëpartiak të organizohen zgjedhje në të cilën do të merr pjesë vetëm një parti, e në këtë rast pra VMRO-DPMNE.
Seanca e KSHZ-së në të cilën do të bëhet njoftimi pritet të mbahet nesër.
Të gjitha partitë më të mëdha politike në vend si LSDM, BDI, PDSH, po edhe opozita jashtëparlamentare, janë kundër që zgjedhjet të mbahen më datë 5 qershor, meqë sipas tyre nuk janë plotësuar kushtet themelore për zgjedhje të lira dhe demokratike. Dhe për më tepër, ato kanë bërë tërheqje nga pjesëmarrja në këto zgjedhje.
Nga ana tjetër edhe komuniteti ndërkombëtar ka vlerësuar se pa pastrimin e listave zgjedhore dhe rregullimin e çështjes së mediave nuk mund të presim zgjedhje të besueshme.
M.Krasniqi – tesheshi.com
