Nga Entela CANAJ
Qindra fëmijë nga e gjithë Shqipëria u mblodhën sot në Tiranë në një marshim madhështor për ti thënë jo punës dhe shfrytëzimit të bashkëmoshatarëve të tyre. Me pankarta në duar ata përcollën dhjetra mesazhe për më të rriturit.
Marshimi i fëmijëve
“Stop punës së fëmijëve, jemi të vegjël; duart tona janë të vogla për punë”; “Nis edukimin shkollor”, “Ndaloni punësimin e fëmijëve”; “Lërini të shijojnë vitet më të bukura dhe lirinë”; “Unë vij në jetë si bekim jo si objekt për shfrytëzim”… ishin këto disa nga mesazhet e shkruara mbi pankartat që vogëlushët mbanin në duar. Studimet e organizatave të ndryshme ndërkombëtare si UNICEF; Save the Children; Ëorld Vision por edhe Instituti i Statistikave Shqiptare raportojnë për shifra alarmante të shfrytëzimit të fëmijëve për punë. Flitet për 57 mijë fëmijë shqiptarë që detyrohen të punojnë, ku 20 mijë prej tyre bëjnë punë të rënda dhe të rrezikshme për jetën, ndërsa 2500 lypin në rrugë apo lajnë xhamat e makinave për 20 lekë të vjetra.
Mesazhi i ambasadorëve
Është për të ardhur keq por ky është realiteti që ne të rriturit duhet ta ndryshojmë, veçse ky fenomen nuk zgjidhet vetëm me një fushatë sensibilizimi. Kështu është shprehur sot në Tiranë ambasadori i OSBE-së Florian Rauning ndërsa e lëshoi këtë mesazh për qeveritarët shqiptarë. “Ne të rriturit jemi përgjegjës për sigurinë e fëmijëve dhe për të ndaluar çdo formë pune që dëmton ata. Sot megjithëse ka ligj që kufizon punën e fëmijëve shumë fëmijë shqiptarë detytrohen të punojnë.
Një studim i bërë nga Organizata Ndërkombëtare e Punës dhe INSTAT-it, tregojnë se në Shqipëri punojnë më shumë se 54 mijë fëmijë të moshës nga 5 deri në 17 vjeç, dhe 20 mijë prej tyre bëjnë punë të dëmshme, dhe të rrezikshme për shëndetin . Kjo është një sfidë që nuk mund të fitohet vetëm me anë të një fushte, pasi shteti ka për detyrë të mbrojë të drejtat e fëmijëve,” tha ambasadori i OBSE-së në Tiranë.
Masat e marra
Sipas të dhënave nga Ministria e Brendshme aktualisht po zbatohet një plan veprimi për të ndihmuar dhe rehabilituar fëmijët në situatë rruge, të cilët janë të përfshirë në lypje apo punë të papërshtatshme për moshën e tyre. Deri tani janë ndihmuar të largohen nga rruga 152 fëmijë nga rreth 300 të identifikuar në Tiranë, Elbasan, Durrës. “Do t’ ju bëja thirrje që të mos harroni që në çdo rast që ju jeni dëshmitar i një rasti trafikimi, të një rasti të shfrytëzimit për punë, të denonconi te strukturat e policisë, të raportoni te numri i telefonit, 116-006, dhe të jeni të bindur që qeveria do t’ju vij në mbrojtje, dhe do t’ju gjendet menjëherë,” tha Elona Gjebrea zv.ministre e Brendshme. Ndërsa zv.ministrja e Arsimit Nora Malaj premtoi se në 2016-ën shifra e braktisjes së shkollës dhe e shfrytëzimit të fëmijëve do të jetë zero.
Situata globale
Jo vetëm në Shqipëri por në të gjithë botën ka mijëra raste të vogëlushëve që shfrytëzohen për punë. UNICEF dhe ILO raportojnë se 11% e fëmijëve të moshës 5 deri 17 vjeç (ose rreth 168 milionë fëmijë) punojnë në gjithë botën. Megjithë masat e marra nga qeveritë përkatëse ky fenomen nuk është zhdukur. /tesheshi.com/
