Nga Ali Abu Rezq
Motoçikletat konsiderohen një prej mjeteve më të rëndësishme të transportit në Marrakesh, të njohur si “kryeqyteti i motoçikletave”.
Të rinj e të vjetër, meshkuj e femra, punëtorë krahu e profesionistë, e madje shtëpiake, mund të shihen vazhdimisht mbi motoçikletat e tyre.
Unë kam patur një biçikletë normale, dhe nisa të përdor një motoçikletë gjashtë vite më parë, pasi sigurova një punë të re,” i tha Abdul Latif Bahiu, një punonjës i sektorit publik, agjencisë së lajmeve Anadolu Ajansı ndërsa priste në një pikë furnizimi me lëndë djegëse. “Motoçikleta ma lehtësoi jetën e përditshme, dhe unë i plotësoj nevojat e mia më shpejt se më parë.”
“Shitjet e motoçikletave këtu në Marrakesh arritën 30 për qind të shitjeve në tërësi të motoçikletave në vend, teksa qyteti është i njohur për përdorimin e gjerë të tyre. Marrakeshit i ka ardhur në ndihmë gjeografia e vet, pa të përpjeta e kodra,” i tregoi së njëjtës agjenci Mehdi Zurajkumi, i zoti i një dyqani motoçikletash në Marrakesh.
Në lidhje me çmimet e tyre, ai shpjegoi se ato fillojnë nga 5.000 dirhemë (509 dollarë), në 10.000 dirhemë (1.018 dollarë).
Zurajkumi të thotë se motoçikletat i blejnë të tëra shtresat shoqërore në bashkësi, dhe shumë familje kanë njëkohësisht makina dhe motoçikleta.
Dyqanet në Marrakesh jo vetëm shesin motoçikleta, por i japin dhe me qira.
Motoçikletat merren me qira nga vendasit apo turistët, të cilët i bien kryq e tërthor qytetit për të mësuar më tepër mbi arkitekturën dhe vendet e tij historike.
Ngarja e mjeteve në Marrakesh është ndryshe nga qytetet e tjera në Marok, me drejtuesit e tyre që e marrin parasysh numrin e madh të motoçiklistëve që lëvizin në të gjitha drejtimet; kjo mund të jetë goxha e vështirë për drejtuesit e pamësuar me kaq shumë motoçikleta në rrugë.
“Motoçikletat kanë shpejtësi të ndryshme nga makinat në rrugët e qyteteve, dhe motoçiklistët e shumtë përpiqen në trafik t’i kalojnë ato, duke shkaktuar aksidente, që më së pari e dëmtojnë poseduesin e motoçikletës. Unë vetë pata një aksident pak kohë përpara, dhe përfundova në spital,” rrëfehet Abdul Latif Bahiu.
“Njerëzit në Marrakesh parapëlqejnë motoçikletat, sepse janë më të lira se makinat. Shumë familje nuk mund të blejnë makina, dhe biçikletat nuk janë të shpejta aq sa duhet. Edhe ata që kanë makina nuk mund të bëjnë pa motoçikleta,” vijoi ai.
Mehdi Vehbiu, një i ri, tha për Anadolu Ajansı, “Motoçikletat janë të parapëlqyera këtu në Marrakesh, veçanërisht nga femrat. Ato ju ndihmojnë të mbaroni punë shpejt.”
Marrakeshi është qyteti i katërt më i populluar i Marokut, dhe gjendet në qendër të vendit. Sipas vlerësimeve të fundit, ai ka një popullsi prej më tepër se një milionë banorë, nga popullsia e përgjithshme e Marokut prej rreth 33 milionë banorë.
Marrë nga Anadolu Ajansı – tesheshi.com
