Autoritetet maqedonase kanë filluar zëvendësimin e shenjave rrugore dhe mbishkrimeve me emrin e ri Maqedonia Veriore. Kjo, në përputhje me marrëveshjen për ndryshimin e emrit të shtetit arritur pas mbi 25 vitesh fërkime me Greqinë.
Dhe starti ka nisur pikërisht në kufirin me fqinjin jugor. Punëtorët hoqën një tabelë me mbishkrimin “Republika e Maqedonisë” në kalimet kufitare me Greqinë, për t’i zëvëndësuar me të rejat ku shkruhet “Republika e Maqedonisë Veriore”.
Kjo marrëveshje përfshin ndryshimin e të dhënave në aeroporte, ndërtesa shtetërore, faqet e internetit dhe materiale të shtypura.
Pasaportat dhe monedha do të zëvendësohen në vitet e ardhshme.
Më parë, qeveria e Maqedonisë Veriore botoi udhëzime të hollësishme me afatet në të cilat institucionet dhe organet shtetërore duhet të vendosin shenjat me emrin e ri kushtetues të shtetit.
Grupit Ndërinstitucional për implementimin e obligimeve nga Marrëveshja e Prespës, brenda shtatë ditëve duhet të bëjë gati standardet grafike që do të përcaktojë përfaqësim pamor të emrit kushtetues “Republika e Maqedonisë Veriore” si pjesë e simboleve kombëtar. /tesheshi.com/
