Nga Mensur Krasniqi
Pas marrjes së parlamentit me zgjedhjen e kreut të ri, tashmë shumica e re pregatitet që në të njëjtën formë të formojë dhe qeverinë e re. Dhe siç po duket, gjaku i derdhur mbrëmjen e datës 27 prill, i është kthyer në bumerang VMRO-së e cila, siç dhe po duket, nuk e ndal dot tashmë krjimin e qeverisë së re me kryeministër Zoran Zaev, pasi nuk ka mundur dot të ndalë as Talat Xhaferin që të marrë frenat e Kuvendit. Ky i fundit u prit me të gjitha nderimet në Bruksel, ku zgjodhi dhe të paralajmëronte formimin shpejt të qeverisë. VMRO tashmë është vetëm në nivel retorike refuzuese, përballë forcës së shumicës së re që po e bën fakt të kryer marrjen e pushtetit, e cila ka dhe përkrahje të fortë ndërkombëtare.
Por a është e mundur kjo?
Nijazi Muhamedi, opinionist politik, është i bindur se qeveria do krijohet brenda dy javësh, dhe pikërisht nga fakti se Gruevski nuk ka më fuqinë të reagojë pas asaj çfarë ndodhi më 27 prill.
“Qeveria do krijohet me siguri brenda dy javësh. Ka shumë gjasa që të bëhet me mandatimin e presidentit i njohur deri më tash si pengestari antikushtetues sa i takon mandatimit të kryeministrit të shumicës së re parlamentare. Pas tërheqjes së tutorit të tij, Gruevskit, as këtij presidenti nuk i ka mbetur ndonjë shesh veprimi kundër shumicës së re parlamentare, legjitimiteti i së ciles edhe sipas Kushtetutës së vendit nuk mund të jetë i kontestueshëm, ndërsa morri edhe legjitimitetin ndërkombëtar që në anën tjetër don të thotë se kjo qeveri teknike me automatizëm është shpallur qeveri ilegale. Në anën tjetër nuk duhet të kuptohen si shqetësuese diskurset e VMRO-së dhe të presidentit që do t’i përdorin edhe më tej në rolin e opozitës rreth qeverisë dhe shumicës së re parlamentare si jolegjitime apo edhe jo legale sipas perceptimeve të tyre partiake”, tha Nijazi Muhamedi.
Po kështu dhe opinionisti tjetër, Bekim Buçi, ka bindjen se Gruevski nuk mundet të lëshohet në aventura të reja pas gjakut të derdhur në Kuvend.
“Mendoj se pas pranim-dorëzimit në Parlament, VMRO-ja e kuptoi seriozitetin e situatës në Maqedoni dhe e mori mesazhin nga diplomati amerikan i cili siç duket i lëvizi gjërat në aspekt pozitiv dhe në drejtim të asaj që shumica parlamentare të formojë sa më parë qeverinë e re. Hapësira për manovra tjera të Gruevskit është ngushtuar shumë dhe nuk besoj se ai do të lëshohet në aventura të reja të rrezikshme. Vonesa mund të ketë por qeveria e re do të formohet nga shumica parlamentare sepse BE, NATO, SHBA dhe vendet demokratike e mbështesin shumicën parlamentare”, tha Bekim Buçi.
Tashmë pritet se si do reagojë më së pari presidenti Ivanov, në adresë të të cilit Xhaferi ka përcjellë një shkresë informuese mbi shumicën e re në Kuvend, pas së cilës vjen dhe formimi i qeverisë buruar nga kjo shumicë. /tesheshi.com/
