Ka skaduar në mesnatë afati për publikimin e listave të kandidatëve, të cilët do të futen në garën e zgjedhjeve vendore në Maqedoni, të caktuara për datën 15 tetor. Partitë politike kanë bërë të ditur emrat me të cilët do synojnë të fitojnë besimin e elektoratit.
Në raundin e parë dy partitë maqedonase, LSDM dhe VMRO-DPMNE, do të garojnë në koalicion me disa parti më të vogla brenda vetes.
Partitë shqiptare, BDI, Lëvizja Besa, Aleanca për Shqiptarët dhe PDSH, kanë vendosur që në raundin e parë të dalin të ndara, duke lënë të hapur mundësitë e bashkëpunimit në balotazh, kur në garë do të mbeten dy kandidatë, të cilët do të sigurojnë më shumë vota.
Vetëm Aleanca për shqiptarët është prononcuar zyrtarisht, duke theksuar, se në komunën e Kërçovës do të mbështesë kandidatin e BDI, që në raundin e parë, për të mos rrezikuar drejtimin e kësaj komune nga shqiptarët.
Partitë shqiptare kanë rënë dakort që të dalin me lista të përbashkëta për Këshillat Komunal në Manastir, si dhe Komunën e Gazibabës së Shkupit.
Por, nuk kanë arritur marrëveshje për të garuar me listë të përbashkët në Qytetin e Shkupit, si njësi e veçantë e vetëadministrimit lokal për të siguruar një numër më të madh të këshilltarëve komunalë.
Sociologu, Ali Pajaziti, duke komentuar mosbashkëpunimin mes partive shqiptare, konsideron se në skenën politike shqiptare dominon ndjenja e triumfit të personave të caktuar.
“Partitë politike shqiptare garojnë të ndara ose “solo” kundrejt partive politike maqedonase, të cilat garojnë në koalicione të mëdha sepse në bllokun politik shqiptar deri më tani kemi pasur një parti të madhe, e cila vetes i ka përshkruar tipare dominuese në skenën politike shqiptare, po në zgjedhjet e fundit përjetoi një zbehje të madhe. Pastaj, kemi një parti shqiptare e cila është në komë, fati i së cilës do të përcaktohet në këto zgjedhje dhe partitë e tjera të dala në skenën politike nuk janë të profilizuara si duhet, dhe edhe në vend se të garojnë me oponentin e tyre kryesor ata garojnë mes vete”, ka thënë Pajaziti.
Megjithëse nuk është lajmëruar zyrtarisht koalicioni mes partnerëve të koalicionit qeverisës, LSDM që udhëhiqet nga kryeministri, Zoran Zaev dhe BDI të Ali Ahmetit, zyrtarë brenda dy partive bëjnë të ditur se ato do përkrahin kandidatët e njëra tjetrës në komuna të caktuar siç është Qyteti i Shkupit, si dhe komuna e Tetovës, Gostivarit, Çairi etj.
Policia ka theksuar se është e gatshme për të realizuar një proces të qetë, korrekt, duke vepruar në suaza të parandalimit të çfarëdo keqpërdorimi të pozitës të cilido funksionar në procesin zgjedhor.
Njohësit e çështjeve politike thonë se këto zgjedhje vendore, të gjashtat me radhë që nga pavarësia e Maqedonisë si shtet, do të jenë nga më të ashprat për vetë faktin se partitë politike shqiptare garojnë me personat më të fuqishëm të tyre siç janë drejtuesit, deputetë, ministra etj.
“Këto zgjedhje do të jenë ndër zgjedhjet më të egra, për arsye se partitë kanë hyrë në këto zgjedhje me elitat politike, hyjnë me atë motivin “tani ose kurrë”. Kjo do të rëndojë atmosferën në zgjedhje. Edhe në listat zyrtare të kandidatëve për kryetar komune kemi liderë të partive politike, parti që garojnë me deputetë, ministra, e rëndojnë këtë situatë dhe kjo do ta rëndojë shumë skenën politike pas zgjedhjeve vendore”, ka thënë për Radion Evropa e Lirë, ish kryetari i Komunës së Tetovës, dhe njohës i çështjeve politike, Alajdin Demiri.
Më 14 tetor do të votohet për zgjedhjen e kryetarëve të 80 komunave dhe qytetin e Shkupit, si njësi e veçantë me dhjetë komuna urbane.
Fushat zgjedhore do të fillojë më 25 shtator në mesnatë dhe do të përfundojë më 13 tetor. /tesheshi.com/
