Nga Mensur Krasniqi
Shpeshherë dëgjojmë të thuhet se “gjyshërit për nipa e mbesa japin më të shtrenjtën”, kjo ngaqë ata kanë një dashuri të dyfishtë ndaj tyre, sepse bëhet fjalë për fëmijën e fëmisë së tyre. Dhe kjo së fundmi është dëshmuar në një rast rrënqethës që po ndodh në Maqedoni, më saktësisht në Radovish, siç informojnë mediat në gjuhën maqedonase.
Gjyshërit e Aleksandrit 14-vjeçar vendosën të shisnin gjithçka që kishin, deri dhe shtëpinë, vetëm e vetëm që të mblidhnin të hollat e nevojshme për dërgimin e nipit të tyre në Turqi për t`u operuar. Ata përveçse kanë shitur gjërat e veta të çmuara, pra mes tyre dhe shtëpinë, gjithashtu kanë siguruar edhe mjete shtesë nga më të afërmit e tyre.
Aleksandri u operua dhe iu nxorr tumori nga njëri sy. Por ja që nuk ka përfunduar gjithçka. Tani, Aleksandri ai ka nevojë që të fillojë kurën me hemoterapi e cila kushton 60 mijë euro. Dhe kjo shumë nuk mund të sigurohet më nga familjarët. Duhen dhe dy shtëpi të tjera për të plotësuar gjashtëdhjetëshen, ngaqë ajo që u shit kushtoi 35 mijë euro.
Andaj, ata kërkojnë ndihmë nga çdo qytetar me shpirt human që t`i vijë në ndihmë Aleksandrit që ai të mund të vazhdojë me jetën e tij normale fëminore dhe me sportin e tij të preferuar, futbollin.
Familjarët nuk kanë mundur që të sigurojnë ndihmë nga Fondi i Shëndetësisë, pasi mjekët u kishin krijuar panik të madhe atyre duke i rekomanduar që operimi të kryhet në një kohë sa më të shpejtë.
Tash shpresa e vetme e Aleksandrit është që të mblidhen të hollat e nevojshme për shërimin e tij dhe ai sa më parë të kthehet në Maqedoni, por ato të vijnë prej njerëzve të thjeshtë, atyre që u dhimbset njeriu, aq më shumë një fëmijë i sëmurë, pavarësisht nacionalitetit. /tesheshi.com/
